2016投資回顧 (文短)

1. 今年比2015年埋單蝕少咗。

2. 2016年，以1月1日價位開始計，都係要蝕，衰過只係持有現金。

3. 年頭好想入貨，但手頭無乜CASH，最後唔敢用僅餘資金入貨，錯過機會。

4. 下半年好多股都回升，一路忍到手無高追，要讚下自己。

5. 無高追之餘10月/11月個別股票有 >10% 的升幅又唔夠狠止賺，而家打回原型，要鬧。(本小幾個月好彩有10%回報應該知足，繼續坐係出於貪心，心底想賺多啲)

6. 13/14年接飛刀的「收息股」頭一年派息看似好禾味，但之後減派息，股價跌，蝕息蝕價。跌咗2年，2016年終於跌唔落，提自己唔好再買「無限補時系」股票。蟹貨等適當時機逐步減持。

7. 今日終於完成轉倉到C仔銀行，減低交易成本！

8. 2017年目標: 回報唔好再見紅；繼續發展小茶飯；迎接家庭新成員 :D


最後祝大家Happy New Year~! 未來一年過得更精彩 !

忍手

無現金喺手時乜都唔使諗，齋睇！有現金喺手就面對好多選擇，睇睇下就好易心急，怕蝕底賺少咗，結果狗衝買咗嘢。結果係點？咪一手蟹貨進退兩難咯。散戶如我經常面對這種困境。借此為鑑，近排又手痕，寫篇文提自己記得要「百忍成金」。

回顧今年，年頭是大好的入貨時機，但往往只能後知後覺。年頭恒指大約18,000點時，合上眼隨便買，現時都賺兩三成。可惜，上年在初期下跌時太急進買入，鎖死了現金，18,000點得個睇字。

如果有時光機就發達喇......哈哈。不過，歷史總是不斷重複的。我會否重複犯錯？

現時恒指在22,000-23,000點徘徊，唔上唔落。今年中間有買有賣，倉值大致持平，沒有過量買入。5月還清P-Loan後，加上收入增加，到年尾手頭現金頗充裕。所謂錢多就身痕，又心思思想入貨。現時港股唔上唔落，市況平穩，而家買分分鐘又有排蟹。

今次要記住上年的教訓，一字記之曰：「忍」！


忍手好過買完貨至斬

打擊濫用公屋大想頭

真係事有湊巧，上一篇文－劏房初體驗中y兄留言提到有關收緊公屋入住資格的意見：

＂我認同長遠嚟講要收緊公屋入住資格 但唔係現在 以現在嘅樓價同租金水平 無論有千百個理由 ~ 其目的就係推人落火坑出去高位接貨 高樓價誰人做成? 有頭髮邊個想做癩痢?＂

今日就出咗呢篇新聞：收回擁物業住戶公屋

有議員提議：「若租戶的入息或資產其中一項超出規定、或持有物業，即須勒令搬走」。哇！咁大把上一代住緊公屋既老人家都可能要搬喎，因為現時入息或資產限額門檻係好低的，如果本身未退休又有穩定工作，真係超標話咁易。而就算退咗休，正常人都有些少儲蓄，銀行戶口得廿零三十萬都只係夠用幾年，萬一呢班邊緣人士被踢走，過幾年應該好快重投綜援+公屋行列。

劏房日記 (一) - 劏房初體驗

這幾年結婚後組織家庭，又忙於工作，時間過得特別快。昨晚夜闌人靜，想起早幾年住劏房的時間，歷歷在目。趁自己仲記得，想想不如將一些深刻的經歷或趣事在Blog中以日記形式寫下，日後翻看定必百般滋味在心頭。

第一回...劏房初體驗

細個成日聽上一代住木屋住板間房，尤記得讀書時新聞常會報導板間房／籠屋住戶居住的惡劣情況，衍生出一系列個人衛生、消防安全等問題，雖然個案值得同情，但離自己生活太遠，沒什麼大感覺。

清蟹股增加現金

呢兩日忍痛清理了一些走勢及前景麻麻的「蟹股」，整理組合之餘增加現金，等待機會再入市：

世茂房地產 (-25%)
買入@$16.5 / 10.5, 賣出@10.1

賣出原因: 貪高息及入場費便宜的二線內房，另負債較其他公司較少，派息亦OK。但2015-2016內地樓市爆升都未有受惠，業績亦沒有大增長，股價更加係唔識郁。有見內地樓市過熱及越來越收緊的政策下，暫時對內房股沒甚信心，套現等機會為上。


聯控集團 (-54%)
買入@$42, 賣出@$19.2

賣出原因: 手痕抽新股之禍...上市後不斷下跌，跌幅驚人又無起色，加上旗下主要公司聯想都自身難保，前景黯淡。雖然銀碼不大，但套現再另找機會好過長擺變廢紙。


小弟向來是明燈，奉勸各位讀者當反面教材看看就好。

通識練習題之拉三打四

假設一補習社開辦課程，收生不斷，密密開班，惟部份途人三五成群，拉三打四，請就以下問題作理性分析，認真討論。

功課遞交日期：無限，適合自己的就好。

1. 使用什麼方法可以有效地判斷補習社質素高低?

2. 如補習社星級導師指其他人成績比他差，沒有資格質問他。你同意嗎? 你認為有哪些人是可以質問導師呢?

3. 有指補習後的學生大都給予正評，更有真人實證，你認為是否足以證明補習社的成效? 真人實證有何好處及弊處?

4. 補習社是非牟利機構，你認為其所得款項可以怎樣利用，以回饋社會?

  

歡迎各位熱烈討論。

遊澳門之觀察報告

適逢中秋假期到澳門遊玩，順便記錄期間的觀察事項，寫寫見聞感想之餘，或許對持有澳門相關股票的Blog友們有些幫助：

1. Turbojet 船票難求

可能湊巧打風唔成，天清氣朗，令大家都想趁假期去個短Trip，加上巴黎人新場效應，早兩天上網預訂船票時，尖沙咀上船的靚時間已經沽清 (即10-12pm去程，6pm-8pm回程)。更可怕的是當天去到取船票時人龍大約有二、三十人，幸好老婆醒目訂好船票，SCAN一下QR code就取得船票，順利出發！最好笑係隔離有個大叔好似去蛇口定珠海的，但無晒船票，喪鬧票務員...連搭扶手電梯走時都繼續問候人地屋企人，真係燥底。

2. 遊客多少?

遊客組合方面，繼續以大陸客、香港客為主外，除此以外，發現韓國遊客亦不少。上船落船期間聽到唔少韓文。大三巴、碼頭等遊客必經之處迫到人都癲，行人路又窄....澳門政府搞搞佢好喎...行得好鬼辛苦。

3. 零售市況

驟眼睇落都幾旺丁，旺唔旺財就無留意。大三巴附近的化妝、衣物等零售店都迫到爆，SASA直情係水涉不通，離遠見到都嚇親。手信店方面，鉅記繼續係No. 1，而新面孔英記插咗唔少旗，可惜人流欠奉。大三巴附近義順好似又少咗間，而賣蛋餅的伯伯都結咗業，食店買少見少，反而零售店數量同以前差唔多。賭場內的零售店都不乏有人行下睇下，應該唔算太差。

4. 巴黎人、威尼斯人、新濠影匯

新濠影匯同巴黎人新場就當然靚，個人鍾意Studio City多D，場地很有電影感，當然巴黎鐵塔亦夠晒gimmick，淨係喺出面影相都有排玩。威尼斯人逗留時間較長，因為想搵葡撻食，結果左兜右兜行咗一大餐。威記人流都唔差，Food Court接近滿座，食物比想像中平，$70有個炒粉麵飯。題外話，隔離枱有個姐姐仔一個人叫三樣嘢食，包括: 炒飯、乳鴿兩隻、仲有一樣唔記得咗，真係食家試味咁...有錢就是任性。

5. 交通

落船時巴黎人Shuttle大排長龍，個個都爭相參觀吧。但回程時又唔算太多人排隊等車，大約15-20分鐘一班車返碼頭，第一架車就上到了。不過Shuttle Bus用Shocking Pink做主色唔係幾順眼。另外，回程時碼頭塞到嘔，好彩我唔趕時間。強烈建議澳門政府改善一下碼頭交通及規劃，D Shuttle左穿右插打晒「Kick」真係唔掂。

除咗搭Shuttle，我呢D平民當然要體驗下迫巴士，發現巴士換晒新車舒服咗好多，不過澳門多迴旋處少燈位，左Fing右Fing，無位坐的話，腳力差D都人仰馬翻。

6. 玩樂

唔賭錢真係無乜好做，澳門去過都好多次，要觀光都觀夠晒，唯有係飲飲食食。官也街燕窩撻而家質素好差...唔怪得無晒人排隊。安得魯平靚正，不過喺威尼斯人周圍行搵咗好耐。

7. 物價

唔知係咪因為記憶仲停留咗喺十年前，今次去澳門覺得食嘢貴咗好多。食個早餐都三、四十；糖水要三十幾；肉丸粥又三十幾；葡撻都要十蚊隻。反而酒店Food Court相對感覺係最抵食...

大家近期如果有去澳門的話，歡迎分享一下見聞。

80後買樓購買欲觀察報告

圖片來源: 文匯報

身為80後，身邊朋友在近幾年陸續成家立室，自不然開始會有置業的念頭出現。無耐面對自2008年後的高樓價，除了部份專業人士或儲蓄力尤如開了外掛的朋友外，其餘的大多數礙於樓價太貴，於是選擇租樓或與家人同住。不過無論租樓或是與家人同住也好，朋友間還是很渴望自己置業。原因為何？下篇文章待續，本篇先為大家分享最近一年在樓價大上大落的環境下，80後的心理轉變。

近一年樓價大上大落，CCL由上年9月高位146.92，在股市大跌的陰霾下急插至3月的127.46，18個月低位，然後近期又快速反彈至133.13。到底這些價格的轉變是否有對「準買家」造成什麼影響呢?

收息的不敗假設

以前讀心理學時總有各種南轅北轍的學派拗足一百年都可以沒有結論。最經典的莫過於性格的先天及後天論。Nature派話三歲定八十，江山易改，本性難易，外貌就更加係遺傳自父母 (以前無咁多整容，而家就話科技先進，隨時變范冰冰)；Nurture派則大言不慚道：「隨機給我一個健康的嬰兒，我可以將他訓練成醫生、律師、乞丐或劫匪」。

死記硬背各大Theory真係差D讀到自己都要睇心理醫生，因為根本混亂到唔知講乜，一時一樣。人性本善同人性本惡兩個不同假設，已經可以有排爭論是否繼續用酷刑或死刑去處置罪犯。慢慢你會掌握到要讀會這科的精萃在於搞清楚各理論背後的不同假設，在不同的情況引用適合的理論去支持自己，是為騎牆或世界仔。

  

本文就同各位探討對於「收息為王」本人愚見下的一些假設：

  

廢青Board聚系列

純吹水、零分享、零得著，仲會識到損友，兒童不宜。

講下廢話，玩下GAME，互相認識下，咁就一晚。噢! 仲要自己真金白銀俾錢埋單，絕對無錢收返，女仔都係AA制。咁廢既Board聚我都無謂TAG另外兩位廢青喇，有心人就自己追下POST。 XD

介紹下今次玩咗兩隻GAME：

1. 雞同鴨搶

背景：飾演農場主人，餵飽你手上為食的動物，食得越滯越高分。

iBond 2016討論

雖然iBond只是雞毛蒜皮的數，但我相信賺大錢往往從搞清楚這些雞毛蒜皮的事開始。買了iBond好幾年都只是習慣放至到期，今手首次嘗試即日沽出，又因為Blog友間的討論令我好奇起來，認真比較一下不同選擇之間的利弊。

在此特別鳴謝狸貓兄寫了幾篇有關iBond的文章，並特意發文2016年的iBond (III)回應我的留言。

狸貓兄iBond系列：

2016年的iBond (III)

2016年的iBond (II)

2016年的iBond (I)

沽出兩手iBond 2016

今日開市沽咗兩手iBond 2016-2019 (4231)，作價$10,377。有趣的是，我發現上年的iBond 2015-2018 (4228) 價錢更高，居然賣到$10,417，一於沽埋佢，還下債先。大家不妨留意下iBond 2015交易價！

未知是因為用銀行牌更較低抑或是暗盤價更高，大家可以參考咚兄可以賣到更好的價錢。


下午補充: 早上iBond 2015-2018 (4228)似乎是有價差或有些莫名的炒作，現時價錢已回落不少。雖然只是小數目，但賺多一蚊得一蚊都係好事，尤其係我呢類蚊型資金投資者，一分一毫可不是小數目呢。暫時看來早上賣出4228的決定是對的 :)

半杯水 (下)

續半杯水 (上)，媽，我好亂啊！20,000點究竟是阻力位還是支持位？

話過會用心理學分析下，呢度就分享下三個有關的心理學現象，呃下LIKE。名詞我慣用英文，請以英文版為準…輔以中文版供各位參考： 

1. 錨定效應 Anchoring

話說早幾天Haagen-Dazs有抽獎活動，有機會得到免費雪條和買一送一的coupon。第一天，中了買一送一coupon。哇！$29.9兩支喎，搶啦！立即到便利店入手了兩條，開心到暈！第二天，又中了N張買一送一coupon和免費coupon。唉，早知唔用買一送一啦，蠢到無朋友。

嗯…Haagen-Dazs買一送一喎，我覺得麻麻地啦，唔係太吸引，你買埋我嗰份。去到便利店換雪條時真係嚇親，每次都見到有人兩支、四支、六支、八支咁買！好辛苦行幾間先換到一支既買剩蔗！

成日話女人善變，原來自己都係咁，短短一天看法已經180度改變。

「錢」家有道

投資新手要學基本功網上有很多免費資源。資訊多，雜訊更多。誠如70後兄所言，投資切忌學壞師。要學師的話，最好向利益衝突較少，又較有公信力的機構著手。

近來甚多廣告的「錢」家有道我認為值得推薦一下，看看其背景乃獲教育局及四家金融監管機構支持的投資者教育中心，比起坊間利字當頭的「財演」或各大大小小的培訓機構應該較為可信。

粗略看了一下，文章內容比較持平、中肯，代價當然是內容較為行貨，沒有「一生三宅輕鬆退休」或「加按買股財息兼收」等動人故事。例如這篇關心自己的強積金提出一些統計數字可以參考，同時亦有一些tips提供給大家。然而，tips並非真理，切勿搬字過紙。理解後吸收為自己的知識方為上策。

這個平台對有基本投資知識的朋友來說可能會太過顯淺，但亦不失為一個溫習的機會，甚或從文章中有機會糾正一些「學壞師」的觀念。

小茶飯系列 銀行開戶篇 (搵兩啖飯食下都咁難!)

話說小茶飯要收錢開票等當然有需要用到公司銀行戶口，於是去找銀行問問怎樣申請，始終長遠計，都一定要有個銀行戶口既。最基本的BR、CI、身份證明文件等備齊後就去各間銀行出發！


第一站：美帝銀行
一入門口已經被一名"sales"職員攔住，問完一大輪後表示唔接受新公司申請，叫我去其他銀行儲夠兩年經驗值先返來，果然有美帝風範。


第二站：散戶愛股1
一入門口聽到職員係以普通話傾計，好彩坐低講廣東話佢都好流利。可惜佢間分行唔做公司戶口，轉介我要去返中小企服務分行先開到戶口，要搭幾個MTR站...咁梗係下次先去啦。


第三站：散戶愛股2
因為之前幫襯過佢，所以搵個老友問一問，不過老友都無情講......要有介紹信先有得傾。


最後一站：國家銀行 & 大海銀行
可能是同集團的緣故，兩間條件一樣，感覺亦較為寬鬆，申請要等一個月左右，希望成功批核，「我都係想開個戶口，搵兩啖飯食下啫」。


獅子銀行預咗佢批唔到所以直接跳過了，看情況要做多兩手準備，繼續努力問多幾間先。


可能坊間太多中小企都好古惑，所以銀行戒心好重，每次入到去都覺得自己好似見工咁。我都明白銀行要符合好多規定，要較為小心保守，但申請個戶口都困難重重，難道初創企業只可以用現金交收？相對之下，申請BR、CI實在太簡單容易。 (雖然自己都曾經蝦碌搞咗一大輪，但起碼係自己能力控制範圍之內可解決)

半杯水 (上)

恒指20,000點有人看成是阻力位，是個心理關口，很難升穿；另一邊廂，亦有人視之為支持位，港股已經很便宜，很難會跌穿。

同時，平民住宅細價樓300萬有人視為阻力位，再升的話超越市民負擔能力；另一邊廂，亦有人視之為超筍入場價，低過300萬一定很多人搶著買。

南轅北轍，你信哪邊？心理學角度分析留待下集發表。

勝利的快感

剛過去的Weekend看了Viu TV的G1格鬥會，話題對決終於上演，由如狼似虎的Winkie對上惹人憐愛的Rika。

早在節目出街一個月前已經有各種八卦新聞報導Rika的慘況，當然要看看過程到底是怎麼一回事！節目中看著Rika被按在地上，一拳拳對正塊面「咪」落去，打完3 Round腫到變咗豬頭個樣，真係見到都覺得痛！

近日，Rika更發佈話要從此退出娛樂圈 :O 如果真係如佢所講，唔係為咗博宣傳的話。。。或者件事對佢嚟講真係好大創傷。

誰是誰非？兩邊Fans支持自己的偶象是一定的了，這個叫in-group out-group bias，「非我族類，其心必異」。一邊話我贏拳賽之餘已經留咗手啦；另一邊就話做節目唔使搵命博既。情況就如球賽中兩隊的支持者，想當然地追求「勝利」的感覺，大家都希望自己的球隊狠狠地擊敗對方。「勝利」不只看賽果，輸家也可以追求精神上的勝利，貶低對手，讓自己「感覺良好」，例如：曼城贏波靠用錢買人啫，又或者當對方射失時譏笑對方咁都射唔入。但可笑的是其實雙方Fans無論背景或喜好都大概相似，喜歡追星、喜歡看G1格鬥會，而爭拗的初衷本來亦十分相近－－支持自己喜歡的藝人。

人，天性就喜歡贏，更喜歡分門分派。

延伸閱讀：The Psychology of Sports Fans - In-group Out-group Bias

相關新聞： Rika被Winkie音招逼走

小茶飯系列(1)：人流小爆發

之前提過小弟機緣巧合之下開展了一個小茶飯，其實都係得個做字。我是一個免費打雜，「老闆」另有其人，正所謂「有力出、無糧出」兼且經常被「老闆」鞭策。不過邊做邊學下，學到唔少嘢，同時亦發現「打工」真的太簡單容易，令我更珍惜現有份正職。平常「打工」每月準時出糧，下班後就私人時間，放假又可以玩個爽，但小茶飯要解決的問題及待處理的工作簡直無日無之，放假與工作已經劃上了等號，要在小茶飯開展的初期要領到「薪水」更是難過登天。

渣打華麗轉身？

話說我Banking一路都好少用渣打，因為其分行不多，又似匯豐、中銀咁要有一個戶口傍身，方便Transfer錢銀。早兩年甚至連細細個時憑籍903演唱會同叱咤飛曾經風靡一時的「Manhattan Card」都Cut埋。從此無再做渣打客仔，但唔知痴咗邊條根，居然見佢跌咗少少就衝咗去做股東，諗返都覺得搞笑。

渣打股價繼續低迷，但近幾個月，渣打有兩件事又吸引到我想選用佢既服務，話唔定業績可以嚟個華麗轉身？

人機大戰

之前看標題曾經看成「機器人大戰」，哈哈，童年回憶太深刻了。

說回正題，最近一個星期在圍棋界有一場鬧得熱哄哄的「人機大戰」，由Google DeepMind開發的AI 「Alpha Go」對上得過多項世界冠軍的頂尖韓國棋手李世石。雙方總共下五局，無論結果如何都會下完全部五局。

縱使過往AI於象棋上已經可以勝過人類，但由於圍棋變化更為複雜，需要計算，同時亦需要所謂的「大局觀」，所以賽前很多專家都認為AI不可能勝過李世石，甚至連李世石本人亦滿有信心可以穩操勝券。程式終歸是程式，找到弱點的話，要連勝應該不難吧。

雙方下了三局後，結果暫時是3-0的比數......

我的投資紀律 (三) - 完

我的投資紀律 (引言)

我的投資紀律 (一)

我的投資紀律 (二)

來到這個系列的最後一集，各位可通過以上連結重溫前集。

第三條：緊記買入、賣出的目的。

 股海浮沉，銀行及證券所有交易就有佣金。所以，他們會設法引誘你出出入入，買買賣賣。面對每天不同的股價，止賺、止蝕位當然是不斷「搬龍門」，總之讓你唔買 (賣) 就身痕。

每個投資者買入資產或投資物都有不同的目的，而因著這個「目的」採取不同的策略及決定。

天壤之別

梅媽稱每月3萬捱得好苦

梅媽財商低得可怕，梅姐財商令人敬佩。有能力賺錢之餘，妥善理財方能保障家人生活無憂。

我都想捱下！

30 Days Challenge

80後、90後成日被標簽成「廢青」，實在太看不過眼這種風氣。80後、90後當中也有不少很努力在付出的一群。有位90後朋友跟我分享了一個Facebook post，內容質素甚高，我看完一篇後不斷爬文，在此同大家分享一下：

http://felixwky.com/tag/30days-iphone/

大約一個月前左右，Felix開始了一個30 Days Challenge的系列，並以嘩眾取寵的標題「用一部iPhone既價錢可以買樓」，成功地吸引了不少目光，同埋更多既批評......

好文分享: 4步驟，存夠夢想基金很簡單 (Update@8/3/2016)

文章來源: CHEERS 快樂工作人誌

http://www.cheers.com.tw/article/article.action?id=5074353

讀後感：(Update@8/3/2016)

相對後半部的「Do's」，我更喜歡前半部的「Don'ts」

X過度依賴專家。「在看Blog的你和我，何嘗不是看著Blogger們的買入賣出動作，試圖尋找一點心靈上的安慰？你有試過看完醫生不用吃藥就痊癒嗎？我試過，我真係試過。」

X高估投資帶來的獲利。「投資都希望獲利啊...人心不足蛇吞象，貪字得個貧...唉...如果股價突然大升，例如10%、20%，應該鎖定獲利還是長線持有？長線持有支持者定有一堆理由在背後，但說到底難道不是因為『貪』更高的回報？買六合彩時，我們都相信所選的號碼會中獎，偏偏你每次連成本都收不回。」

X對金錢的運用缺少中／長期規劃。「認真想了一想...發現我真的說不出對金錢有何中長期規劃。金錢對你有何意義？這一點很有哲學性，值得思考。」

X單純認為「只要有記帳就可以幫助減少浪費」。「十分認同。相反，不記帳也可以做到『應駛得駛』，重點在改變消費模式及思維。我們不需要每秒鐘提醒自己呼吸換氣才懂得呼吸。」

iBond操作

看一看銀行紀錄，2月11日，持有的2017及2018到期iBond又派息了，通漲放緩之下，iBond息率亦越來越低，今次僅僅有2.37%。與早年剛推出時比較，高達6-7%的回報已可一不可再。

回看另一邊廂，今日恒指息率達4.69%，比iBond足足有一倍之多。

是時候考慮一下將iBond轉回現金，以部署大熊市中的機會。這是可用於投資的最後一大資金了，這次要吸取過往心急入市的錯誤，要好好小心運用。預計全數將會投入盈富基金，在風險與回報間取得平衡。

希望可以成功換馬，馬到功成吧！

「點石成金」讀後感：你是投資者Investor嗎？

這本書其中一章讓我重溫了Cashflow Quadrant的四個格仔，看Blog的大家都有投資，但你是投資者嗎？抑或只是僱員或者專業人士？讓我們一起看看作者的看法吧！

新年進步 財源廣進

猴年祝各位投資知識及資產步步高升！

小弟猴年策略：投資方面沒條件做太多動作，可投資現金不多，以儲蓄為主。

給自己的一個任務：以儲蓄將現金水平提升至_______之前，不再買賣股票。

上年太經常地因為手痕而買得太急太快，要改變這個習慣。

今年將會有供樓及裝修兩大開支，有閒錢需要儲起，增加現金水平。市淡真希望自己有更多現金，現在唯有做好防守，繼續持有手上的資產，靜靜等待今年股息分紅。

MPF轉基金

今日全數將國企及港股主題的基金換成恒指基金，節省大約1%的基金開支！

組合中尚餘少量亞太股票基金，暫以不變應萬變，將視乎情況稍後再處理。

總結一下成績

由開始工作至今，斷斷續續買賣過一些股票，但已不太清楚當中的賺蝕。以往的本金甚小，數目也不大，上落就數千元而已。最深刻印象的是海嘯價前，於$80左右開始月供匯豐，然後一直到供股，供股後我停供了，更於60蚊左右套現。雖然賺了股價，現在回看卻蝕了不少股息。到早兩三年前，因有一大筆開支我需要將$4左右買入的工行賣清，於是暫別了股票市場一兩年的時間，現在回看又少收了不少股息。

近兩年收入增加，自己亦改變了消費習慣，雖然開支增加了，儲蓄卻反而比以前多。有閒錢後，又開始逐步買入股票建倉。有一天，看了網上某文章說，做好買賣紀錄對於投資是有好處的。於是，我開始建立了一個EXCEL，記錄買賣股票的日期、價格、手續費及股息等資料。慢慢地，這個EXCEL越來越豐富，我開始列出一些股票的觀察名單，又嘗試以不同的算式去比較各公司的優劣，而我的股票倉規模也比以往更大了。(比起各Blog友只是九牛一毛)

我的投資紀律 (二)

再次執筆這個題目，奉行「三」的簡潔原則，這個系列只會有三集。這個系列的性質與森而兄的森而的程式投資類近，但森而兄的程式肯定比我的紀律更為嚴密，鼓勵大家到森而兄的Blog參考。本Blog系列的前集則請到以下連結：

我的投資紀律 (引言)

我的投資紀律 (一)


這段時間以來一直翻來覆去在想第二跟第三條應該是什麼，自此系列的上集推出後，很久沒有更新過。原因是我想了很久也未能落筆。在投資路上自問只是初哥一名，有很多想法每時每刻都在改變，同時也因為新吸收到的知識及各Blogger的分享衝擊著。事實上，我這兩、三年的投資成績也未如理想，暫時仍是負回報，仍然有太多需要檢討的地方。各位參考本Blog的文章時也應注意一下，切勿盲目跟從。

有些事今天不做，以後都不會做了

早兩天聽聞香港有一名19歲青年獲國家地理攝影大賽冠軍！熱愛行山的我也曾經喜歡帶著重甸甸的單反到山上拍照。本來行山已經耗費相當體力，背著重重的水及乾糧以外，還要額外背上單反及腳架，當中的毅力與耐力實在不簡單。

這又讓我反思到我們眾多Blog友經常追求著財務自由，想著達到財務自由後有多少時間及事情可以做。但其實有些事情今天不做，以後都未必會做了，更殘酷的是可能以後再無機會去做。以50歲的體力及精神有能力應付Kelvin的行程，像他這樣去拍這些照片嗎? 有些事情，是應該由年青人去追、去做的。

當我們在追求著財務自由的同時，也去追一追自己喜愛的事情吧，不要讓自己老來才後悔呢！看完他的相簿後又燃起了我行山的衝勁呢！近年行山越來越懶...已甚少帶相機上山了...

大家也欣賞一下Kelvin的相簿吧 :) 他的相簿精彩的不只是照片，背後的故事更是值得大家細味。

Kelvin Landscapes FACEBOOK



順便送一張我自己行山的照片給大家！