打擊濫用公屋大想頭

真係事有湊巧，上一篇文－劏房初體驗中y兄留言提到有關收緊公屋入住資格的意見：

＂我認同長遠嚟講要收緊公屋入住資格 但唔係現在 以現在嘅樓價同租金水平 無論有千百個理由 ~ 其目的就係推人落火坑出去高位接貨 高樓價誰人做成? 有頭髮邊個想做癩痢?＂

今日就出咗呢篇新聞：收回擁物業住戶公屋

有議員提議：「若租戶的入息或資產其中一項超出規定、或持有物業，即須勒令搬走」。哇！咁大把上一代住緊公屋既老人家都可能要搬喎，因為現時入息或資產限額門檻係好低的，如果本身未退休又有穩定工作，真係超標話咁易。而就算退咗休，正常人都有些少儲蓄，銀行戶口得廿零三十萬都只係夠用幾年，萬一呢班邊緣人士被踢走，過幾年應該好快重投綜援+公屋行列。


以上都只係實行上既問題，政治上既問題係全港有3成人係公屋既「既得利益者」，你搞到人人自危，真係想得罪全村人？

入息及總資產淨值限額 (2016年4月1日生效)

家庭人數		每月最高入息限額 (1)		總資產淨值限額 (2)
1人		$10,970		$242,000
2人		$16,870		$329,000
3人		$22,390		$428,000
4人		$26,690		$500,000

Source: 香港房屋委員會網站


睇埋下文，議員都唔係咁笨既，佢建議：「實行單軌制，即一旦家庭入息或資產，任何一項超額5倍及100倍，即要遷出單位，郭指仍待房屋署進一步研究新建議到底可騰出多少公屋單位，才會作最後決定」。

5倍及100倍佢都講得出真係叻，咁不如唔好搞咁多嘢啦。5倍入息限額或100倍總資產淨值限額收返公屋呢個條件，實行咗肯肯定好有效。即刻諗起呀梁議員添...你咁樣搞法佢仲點體驗基層市民生活呀？而重中之重當然係最後一句，轉身射返個波去房屋署度。

講到公屋，又點少得王先生呢位代表人物呢，立即還拖先：「建議屬政治權宜，在輪候時間不斷創新高下轉移壓力，又直斥在私樓價格瘋狂飆升下收緊富戶政策並非時機。王坤指房署目前每年收回230個富戶單位，收緊後遷出戶「最盡多幾倍」，質疑效果微乎其微，直指「除非緊到收返哂2.6萬個富戶單位，咁就大件事啦！佢又唔夠膽呀！」

王生就突破盲腸喇，講到公屋你點夠佢熟呀？不過話時話，我都幾好奇佢呢個公屋聯會主席係點樣選出，似乎對公屋真係好有研究。

我諗大家又唔使太擔心既，政府政策傾得嚟，到推出都三五七年。再加上立法同執行係兩回事。其實遷出富戶一路都有規矩架啦，係咪執行到先？搞咁多年咪又係得個吉，定多多規矩無人執行都係形同虛設啫。不如實際點整個懸賞制度捉公屋濫用，舉報分分鐘多到做唔切啦。