恒指PE及息率

恆生指數估值(資料提供:Analystz.HK)

2018年2月27日 星期二

和記 (第三回)

尋日公布咗年度業績,非常令人失望竟然一仙特別息都無,再加上業績倒退,恒常既派息亦都減少咗。公布表示會物色合適既項目投資,2018年12月31日年度大會先再考慮派特息。

基於派特息呢個利好因素無咗,而公司拎住舊錢又完全無計劃,賣完業務今年業績都肯定比上年差,我都決定沽晒手上既貨微蝕離場,另外搵更好投資機會吧。

馬後炮的話,遲遲未有放風有特別息可能已經係一個警號,只係自己太樂觀所以忽略咗。如果理性一點,業績出之前炒高咗一成,先沽部份貨止賺會更好呢。

雖然今次賺唔到錢,但操作上尚算滿意,守到自己定下既紀律,不斷提自己唔可以「敢輸唔敢贏」。股價靠穩/上升時以耐性等待,利好因素消失時果斷離場。另外,亦無見股價最近炒上而貪心加注,注碼控制得宜。


但215拎住舊錢照道理有後著,如果年中股價回落到$2.4 以下,再買返博年尾公布業績都未嘗不可。

2018年2月5日 星期一

和記 (第二回)

林SIR近期都出黎推介和記電訊,等我馬後炮認下叻先...

第一次買入和電係2017年5月,當時傳出賣固網,但見股價停咗喺$2.3,所以細細注買咗少少。

(小插曲:買貨時犯了一個低級錯誤,眼殘睇錯派息日做除淨日)

後來賣固網消息越傳越真,好好彩到6月尾股價一個月已經升咗接近20%,到$2.73,所以先行清倉獲利。

到7月26日停牌,發公告可能出售固網業務。

發完公告,寫咗呢篇:和記電訊大贈送?! $3.03股價計,市值146億,固網業務賣145億,雖然話要還債同埋可能有其他雜費,但計埋計埋都無理由咁平掛? 仲未計賣完都仲有唔少業務喎。

分析完覺得值博,所以入咗兩注。個人倉位細股通常只入一注,呢隻算買得比較多。

之後幾個月,升下跌下,仲試過去返$2.8-$2.9,同時望住其他股升到上天,心裡有點不是味兒。不過分析過後,呢筆投資係坐和望贏,所以決心繼續坐到尾。

到近幾日成交增加,,終於等到叫糊喇!看來好快有劇情發生? 有幾位Blogger都有入貨,希望大家齊齊賺返筆新年財啦  :)

如果升到$4,我會考慮走一半先喇!


P.S. 對比其他強勢股升幅實在少得可憐,但勝在坐貨坐得安心。投資組合應該要有攻有守先可以喺唔同既市況之下生存,下下妄想賺到盡只係不切實際。