純粹抒發個人意見及感受,自己投資及買賣,請自己分析及負責。
渣打跌下跌下,昨日仲跌穿埋$60,雖然今日彈返上嚟,但陰啲陰啲跌,其實彈少少真係無乜作為。過去的價格對今日的情況而言已經毫無關係,「有早知,無乞衣」,而家就梗係個個都識講話$100渣打都係貴,但你又點知過多一年半載後你會唔會覺得而家$60都係貴?
入貨前應該要仔細考慮一下,唔好見價錢跌咗好多,好似好平就狗衝入市。我就選擇一動不如一靜,平平哋供完股,觀望下業績先再作決定。個人考慮因素如下 (只供參考):
一、個人有需要增加現金水平,除非有超筍機會,否則要等現金回流
二、渣打前景不明,新官剛剛上任,要一段時間才會見成績,而前朝積落的問題唔似係一時三刻可以解決到
三、用機會成本來看,市場上有更好的選擇,無謂放太重注碼在一支前景不明的股票
四、已供股,少量加了碼,再加碼的動力不大
五、繼續持有我都仲可以接受,反正現價計我又覺得值得坐下,賣完又唔知買乜好,我又無需要出到賣股呢招去增加現金
如果Winters真係咁做得嘢,下期業績已反映到有改善,到時再加碼都唔遲。睇上次份半年業績連佢自己都唔係咁樂觀,雖然唔可以排除佢想嚟一招「置諸死地而後生」,方便自己之後做靚盤數,但既然50/50的話都係小心為上。
祝各位股東好運!