恒指PE及息率

恆生指數估值(資料提供:Analystz.HK)

2016年8月29日 星期一

80後買樓購買欲觀察報告

圖片來源: 文匯報

身為80後,身邊朋友在近幾年陸續成家立室,自不然開始會有置業的念頭出現。無耐面對自2008年後的高樓價,除了部份專業人士或儲蓄力尤如開了外掛的朋友外,其餘的大多數礙於樓價太貴,於是選擇租樓或與家人同住。不過無論租樓或是與家人同住也好,朋友間還是很渴望自己置業。原因為何?下篇文章待續,本篇先為大家分享最近一年在樓價大上大落的環境下,80後的心理轉變。

近一年樓價大上大落,CCL由上年9月高位146.92,在股市大跌的陰霾下急插至3月的127.46,18個月低位,然後近期又快速反彈至133.13。到底這些價格的轉變是否有對「準買家」造成什麼影響呢?


時間點一: 上年9月高位146.92
當時的我繼續四出睇樓,但真係好貴,舊區40年樓齡的300呎樓叫到350萬,仲無乜議價空間,而更大問題係選擇不多,想搵多個盤睇都困難。而朋友間都係嫌樓貴,部份講到自己有負擔能力,但覺得「太貴」、「唔值」,所以唔買住。

時間點二: 急插後的2016年3月低位127.46
嗯...可能年尾加新年的關係,大家都忙著旅行呀、食飯呀等「Facebook放閃」活動,加上「下年樓價跌三成」的預測不絕於耳,已經無人再提關於樓的話題了。實際上,個別屋苑成交對比高位時,下跌是不止一兩成,肯定是有超過三成的,包括我在機緣巧合之下在2015年11月買入的自住單位的屋苑。買入不久後成交價繼續下跌了少許,但未到3月就開始企穩,而且成交越來越少。

時間點三: 近日迅速反彈至133.13加上一手樓熱賣
雖然CCL只是133.13,但業主叫價已逐漸回升不少,要找到較便宜的二手盤已經相當困難。現時樓價似乎有點拉鋸,到底往後是升是跌,抑或上上落落? 大家又要拭目以待了。我懷疑天時係會對買樓欲望有所影響,暑假期間大家又講返買樓的話題。有些朋友仲好心急下,睇咗兩睇就想落訂,唔知係咪天氣熱個人都衝動D?

朋友A繼續PRESENT到自己有條件買,不過太貴唔買住,同埋話睇過新樓之後覺得好靚又有會所,唔係幾想住返舊樓咁話。仲話只要心水嗰區回落到目標價就一定行動。(佢嗰區供應少,新樓近乎豪宅級)

朋友B就唔係好知佢咩事,本來睇開S區樓,屋企人亦住附近,但轉個頭突然話買咗T區樓,仲要山卡啦咁遠。都唔知係咪俾Agent sell兩sell,一時把持唔住衝動咗,唯有希望佢真係啱住啦。

朋友C就目標好明確想買間最少有400呎左右的住,心目中亦有晒Budget,Budget所限主攻居屋盤。而佢係我心目中係幾有自己想法的,佢應該有晒Plan,而家只係爭搵到一個啱價既盤就會Action。不過,其實買細少少私人樓佢會有更多選擇,居屋市場太狹窄了。

朋友D初時雄心壯志搬去同家人住,仲好有信心可以樂也融融,可惜時間證明「相見好,同住難」的硬道理,結果而家喺瞞住屋企人的情況下希望盡快買樓搬走,重奪私人空間。話說早排佢睇樓睇中一個二手居屋單位,喺經紀誤導資訊下仲心郁郁,爭啲就落埋訂,好彩忍一忍手,而家先有子彈入飛抽下新樓。

Anchoring

講咗一大輪對近期80後買樓意欲的觀察,希望大家特別留意3個數字: 146.92、127.46同埋133.13。次序是十分重要的。

情況一:
146.92、「樓價一年跌三成,即102.84」、127.46放在一起時,大家覺得127.46是高是低?

情況二:
146.92、127.46、133.13、「新盤狂熱」放在一起時,大家又覺得127.46是高是低呢? 又133.13是高是低呢?


同一數字127.46在不同的「組別」比較當中,讓我們產生了高低不同的錯覺,心理學上稱之為Anchoring。其實此情況亦常見於日常生活當中。例如,8折放在阿信屋我們會覺得很普通,但放在惠康的話,就感覺很抵買了。這是因為阿信屋經常有789折或更低,但惠康很少會做這些優惠。又或者身高180cm站在姚明身旁像是個小矮人,但其實180cm在中國人當中,已經算得上高大威猛了。

情況一我們預期102.84很快會出現,自然覺得127.46沒有特別低,反而是146.92升得有點太過龍了。情況二127.46已經是短期中大家看見的「最低點」,與133.13和146.92比較,127.46已經「低無可低」,甚至有些人可能覺得146.92才是短期內合理的價位吧。


總結
如果你希望影響自己或別人對高低點的想法,簡單用不同的Anchor就可以得出神奇的效果了!例如: 我有樓但我很窮 => 「很多人一生三宅啊」;股市虧錢但沒關係的 => 「我手上的股票未來會升回來的」;我無女但我有性格 => 「拍拖次數多無用,咪又係分手收場」

26 則留言:

  1. 買樓最緊要量力而為,同埋要好清晰買樓到底自住需要定投資。

    回覆刪除
    回覆
    1. 你令我諗起有位朋友講:「間居屋我地都幾鍾意,不過姑姐話居屋升值無咁好,好似都係買私人樓好D,第時升得快D喎」

      刪除
  2. 好睇好睇。原來80後的心理咁複雜。
    池某當年買樓係因為囡囡出世需要住大啲,完全冇理會樓價,亦錯過左呢啲心理掙扎。呵呵。

    回覆刪除
    回覆
    1. 池兄有「住屋自由」才令人羨慕呢。

      原本買樓自住就應該像池兄這樣簡單的: 有需要 > 買適合自己、自己喜歡的。

      刪除
  3. 老人家ANCHOR重勁。
    當年五毫子一碗魚旦粉。
    五十幾歲BLOGGER講匯豐值200蚊,當時140好平。
    其實呢D都係DYNAMIC0既,我立場係,有能力等,咪等下。
    反正升幅唔夠現金流升得快。

    回覆刪除
    回覆
    1. 70後兄舉一反三,哈哈,魚旦粉同匯豐例子真係成日聽。當佢地仲要晚晚開電視追台既時候,後生既拎住部電話已經睇盡世界各地經典劇集,「做咩要陪你追睇大台?」

      刪除
  4. 謝謝醉心兄的詳細分享,將心理學融入買樓過程,很有趣!
    依家我一見到"一生三宅"呢個term, 就諗起某名向我挑機的香討人士...

    回覆刪除
    回覆
    1. 又唔止佢既...有人更加開BLOG開班鼓吹添,比國民教育更可恥

      刪除
  5. 原來用數字和文法改動可以咁影響人心, 塘人受教, 哈哈XD

    回覆刪除
  6. 利用anchor製造錯覺,係咪都可以算係marketing既一種?

    回覆刪除
    回覆
    1. "旺中" 街頭智慧: 件衫MARK價 $19.99,客人自然覺得$20有找,好抵買 :D

      新樓標榜300萬樓下上車盤,總有一班人唔理呎價狗衝入票。

      刪除
    2. 哈哈,無錯。300萬上車盤只係賣點,實則一個樓盤只有好少300萬以下既單位,呎價仲要勁貴。

      刪除
  7. 有一日趨勢逆轉的話,可能連102.84都覺得貴,唔係有真正需要就唔駛咁急買。

    回覆刪除
    回覆
    1. 跌穿102.84的話...到時又有新的心理Anchor了。

      *戴返個頭盔先: 買唔買樓各位自己決定,純粹分享下身邊觀察同心理現象。我買咗但我係覺得貴架!

      刪除
  8. 這時候價值投資就會彈出來說話了吧XDD
    畢竟不學學在日常生活中用理性分析的話會很容易受感情影響的吧。
    也可以看看這個(茶
    http://wiki.mbalib.com/zh-tw/%E9%BA%A6%E7%A9%97%E5%93%B2%E7%90%86

    回覆刪除
    回覆
    1. 謝謝Tang兄分享的麥穗哲理,知足常樂

      刪除
  9. 多謝醉心兄分享, 總感覺現時的樓太貴, 同意森而兄講:有一日趨勢逆轉的話,可能連102.84都覺得貴,唔係有真正需要就唔駛咁急買。

    何必同佢地顛!?

    回覆刪除
    回覆
    1. 我也認同樓價是頗貴,人口老化加上「父幹」慢慢消耗的情況下,或許樓價跌只是時間問題。問題是到底要等多久? 而你又是否有條件去等?

      我聯想到有些有些傢俬電器會有一年一度開倉日,如果你可以等到那些日子買的話可能比市價平一半有多。問題是: 桌椅或許可以等一年才換,如果熱水爐等一年呢?

      住屋始終不是純投資項目,有條件等的人已經不多,有條件又有耐性者更少。

      刪除
  10. 我就覺得買樓係一件重大事情 要睇時機,時機到先去做事半功倍 時機一日未到一年未到十年未到甚至乎一世未到都唔應該出手 當然每個人嘅條件都唔同但係條件係可以創造出嚟。記得我俩第一次買樓儲首期就係每日只食兩餐 午餐麵包加晚餐一個飯盒:例如生炒骨飯有六粒排骨 我自己要一粒鄉下妹要兩粒淨低三粒留返畀鄉下妹第日帶飯返工 呢種生活大概一年有多就夠畀首期啦 不過為咗實現第二個計劃 層樓喺08年已經放咗!

    回覆刪除
  11. 我認為買樓係重大事情,要睇時機 。時機到可以事半功倍 時機一日未到 一年未到 十年未到甚至乎一世未到 都唔應該出手 只要你願意 條件係可以創造出呢。記得十六年前我倆第一次儲首期 當時我兩每日只食兩餐 午餐只食麵包而晚餐就係一盒飯:例如生炒排骨飯有六粒排骨 我自己食一粒鄉下妹食兩粒淨低三粒留返畀鄉下妹第日帶飯返工食 呢種生活用咗一年有多嘅時間就得到咗我哋第一個首期 而為咗實現第二個計劃 層樓喺08年經已放咗!

    回覆刪除
    回覆
    1. 多謝y兄分享, 我也認同慳儉儲蓄是理財之始, 後生的非常時期捱下是好的。

      香港人對「買樓」太過熱衷了,大部份都是理所當然,其實也沒有對此深思熟慮呢。如70後兄的Blog 帶起「不買樓」的討論及選擇是好事啊。

      刪除