寫上篇既時候，其實我開始時係寫咗下面呢段先…但寫寫下覺得散收收，要執執先出街。
入正題，文長。
成日講話「三十而立」，廿幾歲時十分期待三十的來臨，過了三十後原來更懷念以前的時光。錢，唔係萬能，起碼追唔到青春。而家好多後生仔(頓覺80後都老了…) 廿歲就話要財務自由，社會真係「窮得只剩下錢」？午夜自我反思，三十出頭，講財務自由，也確實不該。不同年紀，不同階段，有不同生活重點。錢，係要儲；玩，同樣重要。
為咗搵錢儲錢慳錢，三十歲前有第一桶金係好爽，但如果犠牲晒青春既時光，就太可惜了。當然最理想係好似70後兄話齋，Why Not Both? 三十前，基本上我係月光族，無乜負債，太硬係儲唔到錢，見到好多廿幾歲Blog友年紀輕輕已經有幾廿萬甚至幾球資產真係十分葡萄，亦非常佩服。到近幾年，資產增加速度快咗，除咗因為結婚修心養性駛費少咗之外，重點係收入增加。
職場新鮮人，一萬人工加到萬二蚊，分別唔會好明顯，反而搵得多，駛錢鬆手咗，反而儲錢仲少咗。加到咁上下，只要開支控制到，隨住人工增加得越來越快(複式效應！)，儲錢速度自然幾何級數上。增加資產不外乎兩大老土心法，開源節流，量入為出。
講返生活。雖然自己無乜錢剩，但總算有過快樂的童年及青年。
