2020倉位更新

股  ~40%
最重倉三隻股:
NFLX
長和
太地

睇個勢香港地產股有排都無運行....希望今年有靚位轉轉倉，或者有買入其他行業既機會，暫時無乜心水呢。


優先股/ETD/債 ~25%
2019年開始分散買咗一堆，每隻都係買少少試下先，今年會繼續吸納。(多謝幾位經常分享定息投資物既Blogger，風中追風、Cherry、皮老闆)


現金 ~40%
經濟麻麻....留多少少儲備過冬吧！減薪裁員已經近在咫尺，奇怪的是好多人都未有危機感? 沒有大陸資金及自由行幫助下，香港真係可以似2003年般快速彈起身?



樓
又舊又細自住一層....當租樓吧...唔計入上面比例。
今年可以再轉按，但估價下跌後，估計無得套錢/賺rebate了。

HKTV 配股

HKTV 係港股組合最重倉既成員。

自爆發疫情開始，大家都匿喺屋企網購，HKTV 就日日升。

今個星期HKTV 仲升到傻咗，高見$7樓上，成交暴增，仲超過埋tvb市值，成為一時熱話，朋友group 都不停討論。果然... 一上頭條，多人留意就代表過熱啦，上完高位就極速回落，尋日仲公佈咗會折讓配股tim!

原本都諗住逐步止賺，餘下揸多陣，讓子彈飛下，但配股消息短期明顯弊多於利，加上經濟麻麻，都係保守啲，止賺2/3，留返少少做倉底算，揸得安心瞓到覺。雖然而家望返$7高位好可惜，但對比買入價$4樓下其實已經回報可觀！十分滿意。無謂掛住$7高位又唔捨得放手啦。待成交縮減，無人留意時再候機吸納啦！

平均價低於$4
見前blog 文

2019年回顧

今年出文甚少，簡單做個回顧留個紀錄。

<Blog>
呢兩年好少出文...一來自己無乜料好寫；二來工作上已經常要「作文」，返工已經寫到攰爆；三來少咗上Blogger流連，睇Blog友既文同留言都甚少。

下年定個目標每月出一篇update下近況吧！

免費寫好文的Blogger買少見少，大家多多留言、俾Like、Share、買書等方式支持下啦！唔好淨係做CD-ROM呀！

<投資>
[方向]
1. 減中港股，增加美股。美股不停升真係好難搵位入貨....
2. 建立固定收益產品組合: 包括優先股、ETD、企業債等。

[回報]
仲未計，以前每月埋數update，今年超級勁懶。拉勻我估平手吧，無乜大上落。

[個股] 幾個擦肩而過的獲利機會:
1. 年頭放走了石藥
2. HKTV未能把握到高位$4樓上出貨。
3. 比亞迪電子不夠耐性坐貨


<事業>
摸索了作為Slash的一段時間，多了對工作及時間的自主權，在可見將來Full-time job只會越來越少，Slash成為主流工作模式相信會喺我退休前出現。讓自己早點投入Slash族，不斷學習，增加employability會是好事。

陪伴家人及自己Hea的時間亦多了，平日可以送完囡囡返學去做下Gym然後先開工，真心爽皮。自由換來的代價是收入的不確定及不穩定性。

2019仍在摸索Slash的工作方向及模式，似有還無，感覺還是有點「虛」，跟打死一份工的形式及感受截然不同，當中有苦有樂吧。2020要繼續發展自己的Business Model。又跟朋友開始了一門蝕本生意，十分好玩又有滿足感，雖然未賺到錢，但我相信係有市場價值。


<家庭>
轉眼間女兒上學了。頭一個月雖然沒有太多哭鬧，但到學校門口總要抱到實，不願落地入校門。到而家會自己背著書包行入學校，返到屋企會講掛住學校、掛住老師，又經常分享學校發生的事情。感覺她真的長大了很多，很快會有自己的一大片天地了。爸爸真的十分不捨，希望多陪伴跟抱抱她。再過一陣子，她就不要我陪，不要我抱了...

Slash工作關係，可以抽到平日的時間同太太倆口子拍下拖，絕對是件幸福的事。

2020年，期待小女兒的到來，讓這個家更幸福更熱鬧。

=============

今年最大的學習是Gain & Loss。有失亦有得。擁抱得到的，捨棄失去的。

失去的可能很苦痛，但得到的也會很甘甜。

大開眼界的懶系投資法

懶系投資法...啱晒繁忙的香港人

書名非常吸晴...但望一望價錢！哇，要成$198....如果唔係一早認識風兄，我喺書局見到應該唔會買囉，內容仲要咁「有料」，打完書釘好似食滯咗咁，消化唔到內容。

接觸投資以來，只識買股同樓兩樣最多人講既目標。閒置現金放喺按揭高息戶口又得兩厘幾回報，只可話聊勝於無。加碼落股票、樓，卻怕風險同波幅太大。如果可以將呢部份閒置現金稍為增加少少風險 (唔係買股同樓)，提升到有5厘以上回報就好喇！

記得某本書 (好似係Intelligent Investor) 有提過，因應市況投資者應該調整自己的組合，Rebalance股票/債券比例，但得個香港銀行戶口，又唔係有幾球嘢既特選客戶，點買到債券呢? 幸運地，呢兩三年間blogger介紹咗好多固定收益投資，如: 優先股、債、ETD等...自己亦開了個ib戶口，漸漸發現香港投資市場外有更多不同的選擇。雖然一直都想將固定收益投資加入個組合當中，奈何五花八門，睇到眼花，加上自己都係超級「懶」，逐篇blog搵嚟睇都幾花時間同精神...

所以遲遲未有行動買優先股、債、ETD......直到..........

純粹出於支持之下...一時衝動買咗風兄本「懶系投資法」，發覺真係好實用，可以跟住一步步買到唔同既固定收益產品！下面係我總結咗本書其中一章教既債券分析方法：

懶系投資法 - 債券分析 Step 1: 了解公司業務 Step 2: 檢查公司本身的評級 Step 3: 檢查公司股價與派息 Step 4: 檢查財務報表 Step 5: 搜尋公司新聞

淨係睇上面5個steps當然好空泛，因為每個Step既實際操作喺本書入面介紹嘛！我用$198買返嚟，梗係唔show晒俾你睇啦！(哈哈) 本書Show晒俾你知去邊個網站，Search乜嘢類型資料，完全係一本工具書，真係一書在手，天下我有，用嚟查資料勁齊勁方便呀！

近期美國減息，固定收益產品價格應該會回落，又係收集既好時機呢！
(更正: 小弟概念錯了，減息 > 債價會升，多謝Yan及風兄留言指正) 我都係返去溫下風兄本書先...

早前第一版已賣斷市，有好多朋友想賣都搵唔到呢，

剛剛加印第二版，大家唔好錯過喇！

洗牌

有危有機..一局遊戲玩到將近結尾。洗牌一觸即發，重新開局比賽。

洗牌後食老本的優勢會消失殆盡...未來是屬於快速成長、有能力改變世界的一群。

弱者將一沉百踩，強者將帶頭恢復。

=============

本局已定，而家唔係計死數，計較眼前賽局輸贏的時候。

及早為下局計劃，定好策略，砌好一手靚牌，隨時準備開局再來。

洗牌後所有嘢從頭建立，原來的強牌可以變極弱，弱牌則有機會變極強。

選股基本條件

趁早前清晒港股，係一個好機會俾自己冷靜諗諗資金如何分配，重新部署未來投資方向：

清倉後港股升唔少，估計約蝕價10-20%。未來除港股外，會將更大部份資金轉投到美股/債市。

雖然無仔細地統計自己成績，但根據記憶所及，簡簡單單揀一堆股，再跟從以下法則就係小弟so far回報最好既方法：

未來選股基本法則:

#1 知其業務

#2 信其前景

#3 人棄我取 (越無人提越好，包括報章, blogger)

股票 - 而家喺watchlist既有:

Netflix

Nvidia

Activision Blizzard

Google

Amazon

Dropbox

Uber

周大福

HKTV

百本醫護

大快活

雷蛇

中銀香港

長和

太古地產

新世界

債 - 暫時未有諗法...抄下功課先...

盡沽港股, 一股不留

無力感很重...包袱很多負擔很多，但我希望做自己可以做的事。那怕只是微不足道，聚川可以成河，集腋可以成裘。雖然看此Blog的人不多，如果你有緣看到此文，希望你可以一齊沽港股，多少也好，理性感性也好！

這是一個情感上的決定，並非因懼怕跌市，而是一種表態，以另一方式表達我們的不滿、憤怒，讓世界更多人看到香港正在發生的事。

一個人做可能很傻，一班人做卻很可愛。曾經歷史是離我們那麼遠，今天我們正一手一腳寫下歷史。


最後，向各位無畏無懼，勇於發聲的人表示最高的敬意。願我們的自由得以保守，今次比起幾年前感受到更多、更強的白色恐怖。下次，還有下次嗎?

愛之深、責之切。因為愛，所以有磨擦，有意見不合。試問那些唯唯諾諾、食花生的人，撫心自問，你有幾緊張這個家裡的人和事? 三姑六婆指指點點的態度實在令人生厭！