恒指PE及息率

恆生指數估值(資料提供:Analystz.HK)

2017年3月16日 星期四

租樓回憶錄 之 古怪伯伯

話說早幾年決定計劃結婚後,同好多年青人一樣,第一個要解決既問題就係「住」。因為兩邊屋企都唔係大,而且「相見好、同住難」。搬返我屋企住呢? 我自己都唔係幾想...搬去女家屋企? 就更加接受唔到。於是同當時的未婚妻搬出嚟住,周圍搵地方,喺周圍搵樓睇樓既過程十分有趣。當中真係遇過好多「怪」人「怪」事,諗返都覺得搞笑,慢慢同大家逐一分享,其中一個故事係咁既...

因儲錢結婚,慳得就慳,Budget少,選擇自然更少,唯有周圍睇吓,將貨就價,今集故事喺九龍東區睇樓時發生。去到九龍東,第一時間諗起淘大德福呢啲細單位大型屋苑,可惜價錢太貴直接跳過。得寶嗰邊本來都可以諗吓。但時值2013年,得寶係炒家天堂,報紙日日報導該區樓價創新高,租金都升到吧吧聲,所以都係租唔起。再退而求其次,沿住條觀塘線搵到去近牛頭角嗰邊有一堆單幢舊樓,價錢應該會比較相宜,於是過去睇吓有無啱既盤。

嗰邊係一個比較「街坊」既地區,地產舖都好有「街坊」特色,記得其中一間門口仍沿用八十年代做法,貼住手寫螢光紙既大字廣告。舖裡面坐住個目露兇光既大嬸,見到都唔係幾想入去。之後行咗幾間,只係得一兩個普普通通既盤當示範單位咁睇吓,亦試過唔少次係問完就發現個盤已經睇過。更誇張係有一兩間都關咗門,行咗半粒鐘再兜返轉頭都係無人喺舖頭,可能生意實在太好。

反正都一場嚟到,唔爭在去埋「街坊」啲嗰幾間問下,總好過食白果嘛。結果又搵到有一間有單位出租喎,不過就無得立即睇,要約業主開門。唯有返屋企等吓。

如是者,過咗一個星期我地再返去睇呢個單位。依稀記得大堂有閘有看更,當然亦有電梯,單位係高層,大約20樓咁上下。去到門口,大門就舊咗少少,類似係公屋既木門...但屋既內籠算係四正,只係傢俬同裝修殘舊。同時,有一樣嘢比較令我地擔心,因為一入屋左手邊有間房,房門係深啡色很殘舊的木板,這道木門係鎖上咗既。不過,好歹都係獨立單位,客廳有大窗,景觀又開揚,已經好過劏房好多,而且價錢平!單位面積三、四百呎,開價只係六千幾蚊,以當時百幾呎劏房已經租到三、四千蚊計,呢個價錢真係平得不合理!莫非真係咁筍?會唔會有古怪呢?係咪兇宅呢?因為價錢平得太離譜,心裡面就浮現咗一堆問題...

既然初步睇落啱心水,直情想落訂,於是問下價錢同埋點解放咁平,呢個時候主角「古怪伯伯」出場喇!原來「古怪伯伯」有個要求,希望留返鎖住木門嗰間房俾佢,用嚟放雜物。呢下真係俾佢嚇親!咁我豈不是要留返條鎖匙俾佢隨時入屋?而佢間房入面又有啲乜呢?好鬼驚架喎!咁搞法分分鐘真係有得震,無得瞓。但周圍都無盤,呢個盤四正之餘又咁平租......博唔博好呢?

既然「古怪伯伯」開出咁特別既條件,一時之間實在好難決定,為咗留返條後路俾自己,當然話返去考慮下先啦......同時,其實已有另一Pair男女上嚟睇緊樓,周圍參觀緊。當我地離開咗之後,聽個Agent講返,呢Pair男女應該今日睇多次就決定落訂喇,叫我地都快啲決定咁話。喺行出走廊等電梯之際,隱約聽到佢同業主好似成交咗......呢Pair男女係咪做「媒」我就唔知,但佢地既神情話我知佢地係好需要搬走咁,眉頭繃緊,神情十分凝重,全程無乜出聲,但一入屋搞到個氣氛都緊張晒。後尾聽返我未婚妻講,話覺得佢地印堂發黑,無嚟精神咁款添...搞到我個心都離一離。之後,我地就無再去嗰區睇樓了。

或者「古怪伯伯」業主年輕時都試過同人分租,所以覺得無乜問題。以今時今日既住屋要求又係咪有租客接受到呢?而家諗返轉頭,自問真係唔敢租嚟住。就算當間房唔會發生靈異事件,萬一間房引發到衛生問題都夠晒煩,仲有「古怪伯伯」可能隨時探訪添......諗起都怕怕。


13 則留言:

  1. 估計間房係放「長生」的,每年油一浸油。

    回覆刪除
  2. 直係係THRILLER...
    等我得閒又寫下D傻傻業主先

    回覆刪除
    回覆
    1. 我都好鍾意睇70後兄既業主系列 :P

      刪除
  3. 住左入去實成日形住間房有古怪囉....=.=

    回覆刪除
    回覆
    1. 係..仲要驚阿伯隨時失驚無神走返嚟

      刪除
  4. 作者已經移除這則留言。

    回覆刪除
  5. 租樓睇樓時有什麼需要注意呢?機器人近來都開始要出去租樓。醉心兄如不介意,不妨分享下。 謝謝!

    回覆刪除
    回覆
    1. 唔好意思, 舊文無留意。如果你仲有需要而又唔介意的話,請喺頭POST留個email比我,我地私下再傾 ((以免我又MISS咗你留言))

      刪除
  6. 可能係拎黎養鬼仔或者供棒陰牌。

    回覆刪除