2017投資回顧

仲有兩日就同2017講Bye Bye，喺度總結一下今年既心路歷程：

見證牛市在懷疑中成長
年頭好多人都唔信港股已經跌夠。喺美股一枝獨秀既情況底下，已經對港股死心，但偏偏喺呢個時間，恒指由20,000點左右一路慢慢升吓升吓，話咁快年中就去到28,000點。龍頭股不斷創52周新高，升到你迷信。喺26,000點左右終於感受到牛市氣氛，Blogger界見到好多新人加入，舊人出Post亦更見頻密，不斷Show Off自己戰績，親朋好友亦紛紛重新投入股市，而閱文IPO既時間亦係今年最High既一段。

閱文引爆股市狂熱

一隻閱文引起全城對股市的關心，身邊從不沾手股票的朋友也躍躍欲試，紛紛開立股票戶口，希望他們不會接太熱的火棒啦！

今個月仲有雷蛇同易鑫排隊上市，唔知會唔會將抽新股既氣氛推至更高？

股壇老手說比起07-08的狂熱程度，14-15大時代及今時今日的情況只是小巫見大巫。07-08我沒有參與其中，未能親身體驗。今次，應該可以親眼見證這個「牛3」到底是怎樣的了。

在2017年11月做個紀錄，記下這個狂熱的時刻，一起看看這個牛市有多牛。同時，也提醒自己不要再手痕加倉，反而要趁勢減倉，保留一定現金水平，等待下次機會。

現在回想15-16的機會，當時因買樓耗掉不少資金，加上大時代中伏的蟹貨，手上所餘無幾，無錢也不敢入市。剩下的小注又買不中「倍升股」。17年低位徘徊又不敢加快入市步伐，白白錯過了今年的升市。

在亢奮市況之中要小心突如其來的冧市呢！今年繼續守住帳面的微利，希望下次機會來到時可以把握得更好吧。

教出孩子的生存力 - 為人父母的重責

最初是從一個前輩口中認識大前研一這號人物。前輩十分推介我多看他寫的書，說很有前瞻性，內容很有養份。可是以我的資質，過往看完後總是一知半解，沒留下太深刻的印象。今次在圖書館閒逛，找一些教育子女的書時竟然見到他的名字出現，當然二話不說借來看看。想不到這本書「貼地」很多，竟然讓我看得很有共鳴。

這本書初版是2013年，看在這一年書中的想法似乎不甚新奇，但要留意的是大前研一已經將這些想法付諸實行了15年之久，實不得不佩服他的遠見。

四種責任

大前研一開宗明義道出人生的四種責任，包括自我、家庭、公司、社會，藉此培養孩子的人生觀及責任心。

這一點與儒家提出的修身、齊家、治國、平天下，不謀而合。香港人有時太現實，只顧搵錢，也許充分盡了自我、家庭、公司的責任，但對社會的責任呢? 大前研一是抱著希望令日本未來的年青人更好的想法去寫這書，香港有這種人、這種書嗎?

牛味

屢創新高，喺今日超越28,000點既時間做個紀錄，一兩年後睇吓自己係咪杞人憂天？

觀察到很多人的反應跟早幾年港股大時代很類似，越來越多人對股市感興趣，今次中國央行「定向降準」是否又會帶來「這次跟上次不一樣」的升市？

不知大家有否發現周遭的人對股市像我的觀察一樣越來越亢奮？

1. 身邊唔投資既朋友問點樣抽新股
2. 同事親戚朋友高談濶論股市
3. 個個都睇升，無人覺得會跌

牛味很濃，一起呼喊GOGOGO吧！

最近在看Fooled by Randomness的中譯版，內容有點困難，要時間消化一下，打算看看綠角兄的review以助理解。書中也有提到在升市時，人總會有「這次跟上次不一樣」的美麗幻想呢。

這個升市希望可以做到運氣好的傻瓜，一起等運到吧，祝大家好運！

用BCG Matrix 調配股票組合

讀商科時教授經常同我地講學習要 "connect the dots"，將看似互不相關的概念組合起來，把不同領域的學問融會貫通。當時聽完覺得有點可笑，教授似乎想將諾貝爾獎頒給「瀨尿牛丸」、「太陽能電筒」和「攞你命三千」一樣。但消化過後，才領略到 "connect the dots" 的大智慧。

成功的人為何要多看各種書籍？正正是希望從中找到不同的dots並連結起來。小學也有教，點可以連成線；線可以連成面。大家有玩過連線圖冊嗎？這是我這一代的童年回憶呢！將眾多看似無關的點點連起來，最後變成一幅圖畫，過程十分有趣！

早幾日忽發奇想，正在思考如何整理投資組合中股票的比重。假如要將股票分為幾類的話又應該怎樣分？腦海中閃過了讀商科時經典的 BCG Matrix，原本是應用於一間企業判斷自身業務的性質及未來成長潛力，從而作出資源調配的分析工具。如果將個人投資組合視為一個基金去管理的話，原理上似乎有共通之處。

P.S. 通常搭車 / 如廁 / 沖涼會有這些靈光一閃的IDEA，你們有試過嗎?

和記電訊大贈送?!

傳咗幾個月，和記電訊終於公佈以145億售出固網業務。但市場反應麻麻，復牌後只係升咗大約10%，現價$3.03，市值是146億。固網業務的售價已經等同市值，莫非非固網業務是「負資產」？

公告中指出賣產的預期所得溢利是57.5億元，由於不太認識當中計算方法，需要稍後再仔細了解。

為了了解非固網業務是否「負資產」，翻看了2016年公司年報。比較固網業務與整體業務的資料如下：

1. 固網收益 41億，佔總收益120億之34%。

2. 固網 EBITDA 12.52億，佔總EBITDA  24.6億之50.8%。

3. 固網資產淨值 35.84億，佔總資產淨值 121億之29.6%。

從以上數字顯示剩餘的流動業務及其他業務是有一定價值的。但市場可能比較憂慮出售固網業務後的公司前景及所得資金未有出路，所以股價升唔起？


總結一下：

正面因素:
1. 現價買入的話，非固網業務算是「免費贈送」
2. 如派特別股息有機會炒高
3. 「輸」的可能性不大，除非公司以財技將賣業務所得現金搬走
4. 十月就完成交易，等待時間不算長


負面因素:
1. 公司持現金但無好的投資項目
2. 如公司不派特別股息，小股東無直接得益
3. 賣出固網業務後，剩餘業務步向萎縮或失去業務間的協同效應


停牌前傳出賣價是94-117億港元時已買入一注，公布消息後$3.09再加一注。個人認為現價頗為值博，靜待往後發展。


Blog友們認為有其他負面因素嗎? 不妨提出討論。

人生 (下)

寫上篇既時候，其實我開始時係寫咗下面呢段先…但寫寫下覺得散收收，要執執先出街。

入正題，文長。

成日講話「三十而立」，廿幾歲時十分期待三十的來臨，過了三十後原來更懷念以前的時光。錢，唔係萬能，起碼追唔到青春。而家好多後生仔(頓覺80後都老了…) 廿歲就話要財務自由，社會真係「窮得只剩下錢」？午夜自我反思，三十出頭，講財務自由，也確實不該。不同年紀，不同階段，有不同生活重點。錢，係要儲；玩，同樣重要。

為咗搵錢儲錢慳錢，三十歲前有第一桶金係好爽，但如果犠牲晒青春既時光，就太可惜了。當然最理想係好似70後兄話齋，Why Not Both? 三十前，基本上我係月光族，無乜負債，太硬係儲唔到錢，見到好多廿幾歲Blog友年紀輕輕已經有幾廿萬甚至幾球資產真係十分葡萄，亦非常佩服。到近幾年，資產增加速度快咗，除咗因為結婚修心養性駛費少咗之外，重點係收入增加。

職場新鮮人，一萬人工加到萬二蚊，分別唔會好明顯，反而搵得多，駛錢鬆手咗，反而儲錢仲少咗。加到咁上下，只要開支控制到，隨住人工增加得越來越快(複式效應！)，儲錢速度自然幾何級數上。增加資產不外乎兩大老土心法，開源節流，量入為出。

講返生活。雖然自己無乜錢剩，但總算有過快樂的童年及青年。

人生 (上)

我太太係一個較為現實的人，早兩日玩PS4我話要儲獎盃，佢就面帶不爽，然後問：「儲黎有咩用？關咗機咪又係乜都無」。嗰下我呆一呆，霎時間唔知點駁佢，亦唔想駁佢，因為佢講呢句重點係唔LIKE我打機 :P 其實全世界女人都係唔鍾意男人打機架啦，都唔係咩新鮮事！

點知更精彩既係…過咗一排，我買咗隻叫Overcooked既Game同佢一齊玩，一隻簡化版多人合作的Cooking Mama，邀請佢玩咗幾關之後，佢之後竟然主動叫我開機同佢玩，仲話要一齊儲齊啲獎盃！

係呢？儲獎盃有乜用呢？爽！開心囉！又唔使下下換到錢或換到咩實質嘢先會「開心」既，有時開心就係簡簡單單花啲時間做下無謂嘢囉！

係呀，打機/玩遊戲關咗機就乜都無。咁拉遠少少睇，其實做人都好無謂，可以無限放大為以下例子：讀書成績好又點？出黎做嘢唔一定人工高；打波叻又點？離開球場咪又係普通人；搵到錢又點？銀行戶口多幾個零得你自己知啫；高薪厚職又點？退咗休識你老鼠。

而最終極既例子係…人終有一死。走嗰日咪同關機一樣囉，咪又係乜都帶唔走，咁成世人流流長真係乜都唔使做啦！哈哈！XD 下次我要記得咁樣反駁下我老婆睇下佢有咩反應先！

下篇再繼續探討...人生。

#扮小學雞玩hashtag
#下集唔知幾時出
#成日爛尾
#點解blogspot無hashtag

四季有序萬物有時

今年Blogger投資戰績紛紛報捷，一片歌舞昇平，港股美股亦屢屢破頂。除了2015年港股大時代不慎入了終極蟹貨外，回報很難見紅了吧。

如果以種田做比喻，現在應該是「夏長」期，部份的田或已悄悄踏入「秋收」期。人性總是貪婪，眼見穀物爆發性成長，就想等它長更壯更大才收割。又或看見別人的田長得比自己好，帶點妒忌又帶點不甘，結果影響了對自己田的判斷。

不如先顧好自己的田，應收割的就收割，還有成長空間的就耐心多等一會。而最重要的是...不要見收成好..有了錢就胡亂播種...這個時間下幼苗是過不了冬的，錯過了2016年尾至2017年頭的春天是有點可惜，但現在只能耐心等待了。


感覺冬天大概快到了，你準備好過冬了嗎?

租樓回憶錄 之 古怪伯伯

話說早幾年決定計劃結婚後，同好多年青人一樣，第一個要解決既問題就係「住」。因為兩邊屋企都唔係大，而且「相見好、同住難」。搬返我屋企住呢? 我自己都唔係幾想...搬去女家屋企? 就更加接受唔到。於是同當時的未婚妻搬出嚟住，周圍搵地方，喺周圍搵樓睇樓既過程十分有趣。當中真係遇過好多「怪」人「怪」事，諗返都覺得搞笑，慢慢同大家逐一分享，其中一個故事係咁既...

因儲錢結婚，慳得就慳，Budget少，選擇自然更少，唯有周圍睇吓，將貨就價，今集故事喺九龍東區睇樓時發生。去到九龍東，第一時間諗起淘大德福呢啲細單位大型屋苑，可惜價錢太貴直接跳過。得寶嗰邊本來都可以諗吓。但時值2013年，得寶係炒家天堂，報紙日日報導該區樓價創新高，租金都升到吧吧聲，所以都係租唔起。再退而求其次，沿住條觀塘線搵到去近牛頭角嗰邊有一堆單幢舊樓，價錢應該會比較相宜，於是過去睇吓有無啱既盤。

嗰邊係一個比較「街坊」既地區，地產舖都好有「街坊」特色，記得其中一間門口仍沿用八十年代做法，貼住手寫螢光紙既大字廣告。舖裡面坐住個目露兇光既大嬸，見到都唔係幾想入去。之後行咗幾間，只係得一兩個普普通通既盤當示範單位咁睇吓，亦試過唔少次係問完就發現個盤已經睇過。更誇張係有一兩間都關咗門，行咗半粒鐘再兜返轉頭都係無人喺舖頭，可能生意實在太好。

反正都一場嚟到，唔爭在去埋「街坊」啲嗰幾間問下，總好過食白果嘛。結果又搵到有一間有單位出租喎，不過就無得立即睇，要約業主開門。唯有返屋企等吓。

如是者，過咗一個星期我地再返去睇呢個單位。依稀記得大堂有閘有看更，當然亦有電梯，單位係高層，大約20樓咁上下。去到門口，大門就舊咗少少，類似係公屋既木門...但屋既內籠算係四正，只係傢俬同裝修殘舊。同時，有一樣嘢比較令我地擔心，因為一入屋左手邊有間房，房門係深啡色很殘舊的木板，這道木門係鎖上咗既。不過，好歹都係獨立單位，客廳有大窗，景觀又開揚，已經好過劏房好多，而且價錢平！單位面積三、四百呎，開價只係六千幾蚊，以當時百幾呎劏房已經租到三、四千蚊計，呢個價錢真係平得不合理！莫非真係咁筍？會唔會有古怪呢？係咪兇宅呢？因為價錢平得太離譜，心裡面就浮現咗一堆問題...

既然初步睇落啱心水，直情想落訂，於是問下價錢同埋點解放咁平，呢個時候主角「古怪伯伯」出場喇！原來「古怪伯伯」有個要求，希望留返鎖住木門嗰間房俾佢，用嚟放雜物。呢下真係俾佢嚇親！咁我豈不是要留返條鎖匙俾佢隨時入屋？而佢間房入面又有啲乜呢？好鬼驚架喎！咁搞法分分鐘真係有得震，無得瞓。但周圍都無盤，呢個盤四正之餘又咁平租......博唔博好呢？

既然「古怪伯伯」開出咁特別既條件，一時之間實在好難決定，為咗留返條後路俾自己，當然話返去考慮下先啦......同時，其實已有另一Pair男女上嚟睇緊樓，周圍參觀緊。當我地離開咗之後，聽個Agent講返，呢Pair男女應該今日睇多次就決定落訂喇，叫我地都快啲決定咁話。喺行出走廊等電梯之際，隱約聽到佢同業主好似成交咗......呢Pair男女係咪做「媒」我就唔知，但佢地既神情話我知佢地係好需要搬走咁，眉頭繃緊，神情十分凝重，全程無乜出聲，但一入屋搞到個氣氛都緊張晒。後尾聽返我未婚妻講，話覺得佢地印堂發黑，無嚟精神咁款添...搞到我個心都離一離。之後，我地就無再去嗰區睇樓了。

或者「古怪伯伯」業主年輕時都試過同人分租，所以覺得無乜問題。以今時今日既住屋要求又係咪有租客接受到呢？而家諗返轉頭，自問真係唔敢租嚟住。就算當間房唔會發生靈異事件，萬一間房引發到衛生問題都夠晒煩，仲有「古怪伯伯」可能隨時探訪添......諗起都怕怕。

錯誤中學習

今日整理緊自己買賣既準則，希望盡量建立客觀既買賣機制，減少人為犯錯機會。整理過程中翻看一下舊文，搵下靈感，有感學習的最有效方法就是「錯誤中學習」。以下就回顧一下2015曾犯過的錯誤，睇吓自己有無進步過。

總結2014-2015慘痛既教訓：
接飛刀+無限補時+賺息蝕價=蝕到PK。

減少犯錯已經係提高贏面。為免重蹈覆轍，所以利豐、聯想、國泰呢幾隻我暫時係無入貨既。(如果時間回到2015年的我，好大機會入咗呢幾隻)


原文連結: http://psyinvest.blogspot.hk/2015/12/2015.html

1. 跌市過於集中買入

雖然今年大跌市時買入了不少股票，可惜過份集中買入一支，而偏偏那支股票反彈幅度最差。白白錯過其他看中，但最終沒有資金及勇氣買進的股票的可觀升幅。

警惕: 近期又入咗少少賭股，似乎重倉咗少少，應該要用換馬形式一買一賣。

2. 升市沒有增加現金比例

大時代開始後過於樂觀及貪心，雖然未有於高位接貨，但由於在2014年底及2015年頭已增持不少股票，應該趁大時代時適當地增加現金等待機會。

已改善: 雖然而家唔算好高位，不過都PLAN好逐步加多啲CASH 

3. 賺息蝕價陷阱

這兩年有兩支股票掉入了賺息蝕價的陷阱，而兩支的共通點是－業績倒退，貪高息率而買入是要付代價的。更慘的是兩支股票都開始減派息，蝕息蝕價！

已改善: 終於無再賺息蝕價...買賣時睇息率亦睇輕咗 

4. 溝貨太密

太心急，越跌越買，結果子彈減得太快，鎖死資金又未能有效減低買入成本。

已改善: 無再溝貨啦，仲學識咗止蝕，收返資金再等機會 

5. 勇於接飛刀

股價急跌不等如便宜，接飛刀後一手是血，幸好尚不算致命，當買個教訓吧。

已改善: 無接飛刀摸底啦，而家會等價格回升再追入 (待實證賺唔賺到錢) 

6. MPF收費太高

未有好好管理自己的MPF，3-4%的管理費居然可以完完全全地蠶食了所有升幅，未來繼續留意低收費的基金，將自己的錢管理好。

已改善: 已經轉晒去低收費基金 

7. 太心急買貨

見個股跌5-10%就急不及待入市，誰不知到超級大跌市時，投資氣氛極差，連股價超硬的優質股都非理性下跌，望著低殘的價錢只能嘆息。

警惕: 近排都手痕咗...要提提自己增加現金!!! 

8. 因小失大

(a) 為了慳手續費，一次過買入太多股數，浪費子彈。

(b) 為了慳一兩個價位，錯過買入機會。

改善一半: (a)而家每次買賣最多約佔倉位10%，唔錯  (b) 呢個未完全改到，有時都係師奶仔心態，為一兩個價位搞到成交唔到 

MPF轉到保守基金

唔覺唔覺升升下，恒指已經過咗23,991，按小學雞MPF Rebalancing策略，部份資金由股票基金轉到保守基金。


同時，股票倉都要計劃一下減持行動，不斷改善組合。

以前見邊隻有賺或升得多就賣走，結果個倉越來越多蟹貨，升咗既股就越升越有，想買都買唔返。

近期轉咗mindset，一方面平衡每隻股既資金比例，一方面採取賣走弱勢 / 業績差股，持有強勢 / 業績好股的策略，且看2017年尾時成效如何。之前大約$68沽清渣打，雖然實現咗唔少既虧損，但起碼心情輕鬆不少。下次止蝕要早啲、狠啲。

992聯想業績

自己992無貨，不過上年都心郁郁見佢低到咁殘諗過入少少。近期睇到有啲Blog友既文之後令我又對佢又有啲好奇，睇下佢份業績，當做吓功課又練習下睇年報都好。

一路睇業績時，我心入面會問一些問題，希望從中找到答案。下面同大家分享一下我既思路:

Q1.今年賺錢係咪生意好咗? 
睇返收入比上年仲少咗，即係生意仲差咗。

Q2.承上題，生意差咗點解比上年賺錢? 
因為今年經營費用大減13億美元

Q3.點解經營費用可以減咁多? 
上年重組6億，存貨報廢3億，今年無呢兩條數。即係其他地方仲慳咗4億

Q4.有咩地方慳咗4億? 係咪節省成本或提升效率?
行政費用! 慳咗3億 ==> 因為裁員! 少咗人做嘢 => 生意差 => 惡性循環開始?!

Q5.會唔會買入992?
唔買...衰股可以一沉百踩。Esprit、渣打、利豐，前車可鑑。博跌緊既業績反彈不如過大海賭大細。

成功等運到?

坊間有很多教人「成功」的課程或例子，通常會提及什麼內容?

人定勝天? 你唔成功因為你未夠努力，未夠想要? 好多所謂「成功」課程都特別強調「個人能力」。

投資界中，巴菲特無人不識，係一個成功既投資人，大家會認為佢好叻，獨具慧眼，有過人的投資才能。大家都爭相去學佢既成功之道，研究巴菲特的投資方法。如果巴老同你講佢既成功只係好彩，你一定會話佢「太謙虛」。

但睇完「Outlier 異數」問呢書，可能你都會認同巴老某程度上只係「好彩」。書中作者會證明俾你睇，「能力」只要過到一個「門檻」，其餘令你成功既往往係外在因素。一篇推薦序用了「一命二運三風水」作簡介，實在十分貼切。

IQ低過100就當然成就有限，但如果有幾個人IQ都係高過120，又係咪IQ越高就越成功呢? 個人能力其實只要過到「門檻」就夠。IQ 80同 IQ 120分別可能很大，但IQ 160 同 IQ 200呢?

如果個人能力未能解釋一個人成功與否，咁，會係咩原因?

小學雞MPF Rebalancing策略

呢篇文係小學雞程度用MPF做Rebalancing，而且只是初步實驗階段，成效有待驗證。制定此策略的目標很簡單，就係打敗2009-2015的基準回報率，6年 = 0%。睇返Statement，過往供咗六年都係得個吉真係好無奈，加上而家人工多咗，MPF越嚟越大舊錢，決定要改改個操作，為退休生活打好基礎。

基準: 2009-2015，6年分散投資於國際股票、亞太股票、中國及香港股票等，期間沒有做任何轉換，每月新供款全數供入各基金，最後得出 0%回報成績，「成功保本」。

目標: 2016-2022，用以下Rebalancing策略，錄得正回報，並跑贏恒指。

為咗爭取比以上基準線更高的回報，上一年開始重整自己的MPF，做咗頭兩步。今年為咗寫呢篇文又再進一步，做埋第三步。