恒指PE及息率

恆生指數估值(資料提供:Analystz.HK)

2019年6月13日 星期四

盡沽港股, 一股不留



無力感很重...包袱很多負擔很多,但我希望做自己可以做的事。那怕只是微不足道,聚川可以成河,集腋可以成裘。雖然看此Blog的人不多,如果你有緣看到此文,希望你可以一齊沽港股,多少也好,理性感性也好!

這是一個情感上的決定,並非因懼怕跌市,而是一種表態,以另一方式表達我們的不滿、憤怒,讓世界更多人看到香港正在發生的事。

一個人做可能很傻,一班人做卻很可愛。曾經歷史是離我們那麼遠,今天我們正一手一腳寫下歷史。


最後,向各位無畏無懼,勇於發聲的人表示最高的敬意。願我們的自由得以保守,今次比起幾年前感受到更多、更強的白色恐怖。下次,還有下次嗎?

愛之深、責之切。因為愛,所以有磨擦,有意見不合。試問那些唯唯諾諾、食花生的人,撫心自問,你有幾緊張這個家裡的人和事? 三姑六婆指指點點的態度實在令人生厭!

2019年4月18日 星期四

升到HiHi

上年個倉長期見紅,今年差不多全部都轉晒綠色了!

而家睇返,當然覺得18年尾25,000點係絕佳入市機會,但當時夠膽重鎚又有幾人? 又一次證明買股票要逆市而行,戰勝心魔係幾咁重要。

而當時,我都淆晒底,唔敢入貨。慶幸戰勝心魔無止蝕,維持住個倉位,仲有啲運地轉咗組合加咗少少倉,暫時回報頗理想!希望今年守得住,年尾埋單成績比往年好啦!

到咗呢個時間...大家都想gogogo,自己又開始起貪念想追貨...直覺話我知似乎離跌市不遠了。好有衝動地想追貨加倉之時,就應該逆向做減倉啦!即使唔減倉都唔好再加了!

忍耐忍耐忍耐

等下次危機出現之時再入貨吧!

2019年1月16日 星期三

2018回顧

2018年出文越來越少。主要原因有二:一是無乜好寫、二是公私兩忙。但有幸喺呢度識到唔少Blog友,小弟會努力Keep住個Blog更新。(P.S. 同時亦表示我未輸到潛水 XD)

睇返2017篇回顧,百般滋味在心頭 (傳送門: http://psyinvest.blogspot.com/2017/12/2017.html )
話咁快又已一年,今年經歷大上大落,

個股票倉由18年1月最靚仔既+12%迅速打回原型,年尾埋單 -10%,又一年負回報,真係唏噓。睇返紀錄...2017原來我係有錢賺,只係跑輸大市,打文前以為係連續咁多年都負數!

以下整理返近年股票交易既年度回報先:

2014-2015: -27%
2016: 無計算
2017: +18%
2018: -10%

P.S. 仲未計今年試驗性買賣期權,好似都蝕咗幾千蚊至一皮嘢。交學費大概了解咗操作同風險,遲啲睇下點樣將期權加入股票倉一部份。

再望返上年既回顧,2018年既目標係75%失敗,25%成功!((之前前後掉轉咗, 已更正))

2018年投資目標:繼續保持正增長...揀中1-2隻長線潛力股

正增長: FAIL

揀中潛力股: 成功 (但無落注或無落重注!所以得25%成功),放咗喺Watchlist但無下注有日本城 / NFLX) 另外 268 金蝶太早賣,因小利而忘記咗「放風箏」既計劃。

今年當然亦有唔少蟹貨,名單如下:
大家樂 (食物/服務質素越嚟越差,息率亦唔吸引,會賣走了)
比亞迪電子 (中間買買賣賣賺咗啲差價幫補下,唔係太重貨,即管坐吓睇業績,反正暫時跌到勁殘)
周大福 (Well..希望下年Keep到派息)
南方A50 (ETF都大上大落,當佢半隻蟹,好彩高位走咗啲)

2018年見證10月24000-25000 點人心虛怯時亦是本年低位 (有Blog友留意到當時開始有Blogger都淆底,要清倉!可見投資氣氛之差),2019年會否見證牛市在懷疑之中成長呢?(到時應該又有Blogger表示要追貨滿倉Gogogo,大家要留意呢個訊號喇!) 明年今日就有答案喇!

2019年目標

今年公私兩面更忙...
[股票] 一切從簡,待下跌月份分段儲貨
[樓] 無錢,繼續窮住很Warm的蝸居
[個人] 又去讀Master...本來都無諗過讀,因工作上有啲改變,所以讀吓啦!又可以順便完成自己人生既一個目標 / 理想,十幾萬都係值得既!反而係時間、體力、精神上真係覺得大不如前了,今年要努力平衡家庭、事業、學業!


其實除咗股票、樓、債等等資產外,更更更重要係花時間投資喺個人、家庭同健康上呀!祝各位Blog友搵到錢之餘,家庭、健康、事業等方面亦有所進步啦!

2018年11月12日 星期一

近排跌到hum hum聲,浮一浮上面報個平安先。蟹就一定,邊有咁叻仔年頭全清港股丫。慶幸係無大幅度加大倉位溝貨,暫時保持一半現金等待機會。如果淨係計股票淨值,同年頭比較應該跌咗15-20%,都幾肉赤下。

潛水主要原因係無乜嘢好寫同埋工作十分十分忙。今年工作上有新挑戰、新轉變,進入咗打幾份工既狀態,放工想打下機都無時間。跌千點嗰啲日子想話買下貨都唔得閒,眼白白錯過咗短線反彈補下血既機會。而家啲股唯有繼續坐下,又要進入賺息蝕價mode。

十月市況尤其淡,有啲似早幾年 (大約14-15年嗰陣),個個都睇定啲,大叫Cash is King咁話,呢個時間開始入貨應該輸極有限。穩陣啲就攤長佢,月供形式慢慢入吧。跌到肉赤想賣既時候就係更加要大膽入貨既時候!

樓方面似乎終於肯跌吓。但好似我呢啲窮L,得一層上車盤自住,賣又唔係,唔賣又唔係。想住大啲但又唔想搞雙租咁煩。會唔會跌到一個位可以俾我平賣平買換間大兩房或三房呢? 而家7m - 4m = 相差3m,如果一齊跌多兩成,即係5.6m - 3.2m = 2.4m,除咗按揭易做咗之外...好似無乜大分別...

如果...7m樓跌一半,到3.5m的話,供萬幾蚊...哇,咁咪仲平過租,跌到咁的話應該全香港仆直,可能我層自住比人Call Loan都似。

我都係返去努力工作儲錢先喇!而家工作忙咗,投資一切從簡。股,得閒就買少少,慢慢儲資產。期權,短線投機都放埋一邊了;樓,最緊要住得開心同舒服,慢慢供吓當儲吓錢先啦。最緊要係珍惜同屋企人相處既時間!個女大咗,而家可以多啲帶佢出街周圍玩喇!

2018年8月13日 星期一

MIP Refund 申請按揭保費退回

買咗層樓2年,過咗罰息期立即搞轉按賺回贈。而除咗回贈外,3年內甩按保仲可以申請MIP Refund。以買入時樓價300萬樓,借9成為例,最少可以回返萬幾蚊架。上網搵咗一輪都無資料講點樣申請,就連香港按揭證券有限公司都無....

For有相同需要既朋友,唔使周圍搵得咁辛苦,呢度就俾個懶人包大家參考啦!

首先你要符合以下條件:
1. 好幸運可以唔使補錢由9成轉到6成按 (要補錢就咪搞咁多嘢啦!)
2. 兩年內轉按退25%保費 / 三年內轉按退15%保費

註1: 如果只係爭少少,補錢轉6成按,賺返回贈同退保費可能都有賺的,詳情自己計數吧。
註2: 兩年退25%根本係廢,未過罰息期,俾銀行罰1%樓價仲要嘔突,所以唯一機會係第2-第3年申請退返15%,過咗第3年就無得退了!!

做法其實好簡單...
1. 寫封退MIP既申請信 (要自己作,詳情問返原按揭銀行,我個律師幫我作埋)
2. 將封申請信正本交返去原按揭銀行
3. 等大約一個月錢就到戶口了

**唔需要自己搵香港按揭證券有限公司搞

希望幫到有需要既朋友啦!

2018年8月3日 星期五

跌到有啲肉赤 (隨筆)

隨筆....組織好鬆散,大家當日記咁睇吓算啦。

今年工作成日要作文,無乜心計再喺Blog作文,抱歉了。好耐無更新,簡單地我手寫我心。
==========================
磨吓磨吓...股市由年頭GOGOGO嘅33,000點跌到28,000,中間溝貨博反彈應該蟹咗唔少人 (P.S. 我都有份 You are not alone)

尋日再跌600幾點,開始感覺到市況真係有「淡」同「絕望」嘅感覺,但個人直覺仲要陰乾下個市先會見底。彈下跌下,大概要半年到一年時間吧。(靠估無痛苦) 買賣自己負責吧,切忌跟風!!個人經驗,跟風瀨嘢機率甚高。

根據往績,到我想清倉之日就係谷底之時。而家咩心情? 仲係想溝貨博反彈....咁推測落去,即係有排跌。大家不妨參考下我呢盞明燈準唔準。
===========================
入唔入市? 個心十五十六。趁呢個機會睇返舊文,回顧下自己心態。

發現又再一次重複犯錯,年頭高位無好好減持再等機會。但另一方面亦證明,嘗試去time the market係十分困難並且要有相當運氣。幸運嘅係,做完轉按又有一舊錢返嚟,而更重要嘅係,今年穩定嘅主動收入又增加不少。
===========================
給35歲前的Blog友,事業正值黃金成長期,努力增加主動收入好過日日望「市」打卦,唔好俾班「少年財演」嘅「財務自由」假願景塗毒心靈。後生開始學習理財係重要,但無需過於投入,反正可投資嘅本金不多。(P.S. 有父幹或廿幾歲年薪過百萬另計)。

24-35,你嘅人生目標應該係為事業打拼,為愛情奮戰。談退休? 少年你太年輕,除非你甘願做廢青。
===========================
高位低位? 從來Anchor位不斷改變。所謂今日高位,明日低位。反之亦然。估中,咪叻仔。估錯,咪傻仔。

此文提醒自己,嚟緊呢個浪,唔好再靠估。做好資產配置,攻守兼備,不要清倉,亦不要滿倉。成手CASH唔知有乜用,耗盡CASH流失機會又好揼春。

打好份工,繼續用主動收入泵大資產,永遠留一手「守株待兔」。食好瞓好,好好享受工作同生活樂趣。

2018下半年,升固欣然,跌亦可喜。

http://psyinvest.blogspot.com/2016/12/blog-post.html
===========================
最後送個我嘅Watchlist俾大家 (請自行做功課及分析,最好俾返我抄功課)


1. 周大福
2. 比亞迪電子
3. 長江基建
4. 南方A50

Bonds
1. 抄風兄個List XD  (credit: http://laxinvest.blogspot.com/2018/07/ib2018.html)


1. 換大兩房/三房單位...(發下夢...要大跌先有機會)

2018年6月11日 星期一

細細注 VS 大大注

為什麼要細細注買?
1. 怕睇錯
2. 手痕
3. 無錢

為什麼要大大注買?
1. 贏大錢

=====================================

如果你一路都好似我咁,每次雞仔注咁買,應該會發覺輸錢唔肉赤,贏錢無乜感覺。細細注買可以有千萬個原因,歸根究底就係無做足功課但又貪心想賺錢。大大注唔敢買就係怕風險高,怕輸錢。

咁有咩方法可以令自己夠膽大大注買去贏大錢? 答案就係做足功課,唔好俾自己買錯輸錢!當你唔敢大大注買既時候,可能,你根本就唔應該下注。手痕貪玩,總係會付出代價。

細細注如拍散拖;大大注似娶老婆。拍散拖係幾過癮,但要有美滿人生,都係要搵返個好老婆,勇敢commit落去。

=====================================

Charlie Munger話一生人可以發達既真正機會可能得幾次,到機會來臨時記住要大大注買。

所以,今年開始改變一吓,減少手痕既細細注買賣,耐心等每年一次半次既真正機會勇敢下注。