2017投資回顧

仲有兩日就同2017講Bye Bye，喺度總結一下今年既心路歷程：

見證牛市在懷疑中成長
年頭好多人都唔信港股已經跌夠。喺美股一枝獨秀既情況底下，已經對港股死心，但偏偏喺呢個時間，恒指由20,000點左右一路慢慢升吓升吓，話咁快年中就去到28,000點。龍頭股不斷創52周新高，升到你迷信。喺26,000點左右終於感受到牛市氣氛，Blogger界見到好多新人加入，舊人出Post亦更見頻密，不斷Show Off自己戰績，親朋好友亦紛紛重新投入股市，而閱文IPO既時間亦係今年最High既一段。


儲錢很重要
雖然這句話好老土，但確是不變既定律。妄想買中十倍股，一夜致富太離地。要收息達到自然增長滾雪球卻要有一大舊本金。如果你本金唔多，最實際就係好似我咁，努力儲錢，開源節流。搞掂主動收入先慢慢諗被動收入。

今年小弟最主要既CASHFLOW流入就係來自主動收入，因為早兩年買自住樓近乎清咗倉，我而家個倉實在太太太太細了！

個人認為投資本金如果係每月儲蓄額35倍以下的話，主動收入同儲蓄係首要應該要管理好既事。假設你每月可以維持儲到1萬，而你本金起步得10萬、20萬，儲一年錢已經可以令你既可投資金額Double咁上。但你拎住10萬、20萬左炒右炒或者買10厘股，要賺一倍係難到飛起，加上要有一定運氣。相反，每月儲1萬，如果你係有能力做到的話，你只需要控制好自己既消費欲同努力搵錢就搞掂。如果你連有紀律地儲第一桶資金都做唔到既話，都係放棄投資啦！


有耐性會賺錢
回顧今年賺得最多既股就係持貨最耐既股，亦當然因為今年由年頭升到年尾，以前買落既貨大部份都賺。呢堆應該唔會點郁，用嚟做最後既倉底貨，妄想全CASH等冧市始終太過不切實際。

2822 A50  ETF果然利害，年頭加倉既決定正確
1928 金沙 出出入入賺咗少少差價，收埋2次股息算唔錯，股價唔算升好多
3988 中銀 收息，股價升少少，勝在穩穩定定唔使擔心

一堆陰陰升既收息REIT - 778 置富 / 1270 朗豪 / 87001 滙賢 / 6823 香港電訊
慢慢收下息，帳面意外賺少少


有運最緊要
有啲股雖然有信心持有，但賺得多與少真係要睇運同時勢，分散投資個股有個好處就係容易做Re-balance，視乎個別股票表現收割同止蝕。

215 和電 5月時博佢賣產，真係中咗獎，而家博埋佢派特別息炒高下，炒唔起最多只係賺少啲
268 金蝶 呢隻見鍾兄推介過，純粹跟佢買，好好彩食到個升浪，而家可以擺喺度放風箏


失諸交臂
如果呢堆股我無賣...而家帳面應該靚好多，可惜唔敢賺。係賺少咗，但維持紀律減倉，控制風險更重要。

175 吉利 年中買過....但大家都應該試過，一買入就升10% / 20% 既誘惑係好難抗拒...真可惜
6288 迅銷 年中有單IPO無啦啦關佢事...之後係咁升...可惜佢港股計法有古怪，唔係幾放心長渣
285 比亞迪電子 曾經升到$26...不過而家又碌返落嚟啦，就算唔賣都好難捉到之前個高位既


投機
Timing好重要，無時間睇實同埋個人唔夠狠的話千祈唔好試，Miss咗個Timing就賺變蝕。

百本醫護轉主板投機，太貪心，第一日無走到，結果就賺錢變打和。
288 萬洲 諗住博佢入恒指成份股，點知唔識郁，按紀律賣走咗

IPO
6113 UTS 本來係想認購1932中漆，但禁錯制...反而呢隻有賺，中漆要蝕
6060 眾安 超有運，抽中咗兩手，即日鮮


蝕錢股
衰股建議大家都係止蝕好過心掛掛，重新出發換馬可能得到會更多。

288 渣打 經典蟹貨，年頭忍痛放晒重新出發，成個人輕鬆晒
880 澳博 另一經典，喺接近高位$8賣晒換馬，執返身彩，計返買入價都係要蝕
341 大家樂 年中買入，賺息蝕價ing，唔知使唔使止蝕，入咗深切治療部，要密切觀察


伏股：(好彩未買)
293 國泰
87   太古B...個個諗住大藍籌

經過渣打一役，見過鬼怕黑。呢啲業績差既股你衝入去博短期反彈，中咗招就欲哭無淚。開頭股價跌以為變高息股，結果一減股息就跌到渣都無。

呢類股有無跌完既一日呢? 最重要都係睇業績，如果你揀中思捷同利豐就sor9ry喇，真係越跌越有，一沉百踩。另一方面，滙豐、渣打呢啲衰股今年都有慢慢回升吖，國泰同太古B又得唔得呢? 由渣打既奶嘢經驗我覺得可以留意以下幾點：(但最好都係細細注算啦，中招都無咁傷嘛)

抽象派：(純個人直覺，無實際數據)
1. 多唔多Blogger/雜誌推介? 越多人推介就越要避開，尤其係多人睇既Blog (哈哈)
2. 要有耐性，唔好見大跌就接飛刀，往後既陰跌先係最傷
3. 業績有無改善? 放喺抽象派因為兩個原因：一、要估未來轉好定轉差，睇出咗既業績已經有delay。二、又係要估，估市場反應，有啲股表面業績轉好都可以跌。


現實派：
1. 股息有無減? 通常頭一兩次派息都會頂到，睇多兩三期或者睇吓管理層有無提未來派息政策。本身高息既藍籌股，減派股息係最大鑊。
2. 成交大唔大? 如果成交細陰跌就要繼續等，等到成交大返就可以諗諗進場

綜合以上兩派，個人對太古比較樂觀，吼下位收集少少擺下，不過要有強大既心臟準備向下溝或止蝕，細細注都無妨既。


整體上，今年雖然稍為跑輸大市，但完成咗自己唔使蝕錢既目標 (會否太無大志? XD)。買賣方面亦更加有紀律...無再胡亂加倉同埋過份地向下溝。當然，今年太順利，由頭升到尾，下年相信唔會咁順利，要小心迎戰。


2018年投資目標：繼續保持正增長...揀中1-2隻長線潛力股


最後，祝大家有個愉快既2018年 :) Happy New Year~~