恒指PE及息率

恆生指數估值(資料提供:Analystz.HK)

2017年7月7日 星期五

人生 (下)



寫上篇既時候,其實我開始時係寫咗下面呢段先…但寫寫下覺得散收收,要執執先出街。

入正題,文長。

成日講話「三十而立」,廿幾歲時十分期待三十的來臨,過了三十後原來更懷念以前的時光。錢,唔係萬能,起碼追唔到青春。而家好多後生仔(頓覺80後都老了…) 廿歲就話要財務自由,社會真係「窮得只剩下錢」?午夜自我反思,三十出頭,講財務自由,也確實不該。不同年紀,不同階段,有不同生活重點。錢,係要儲;玩,同樣重要。

為咗搵錢儲錢慳錢,三十歲前有第一桶金係好爽,但如果犠牲晒青春既時光,就太可惜了。當然最理想係好似70後兄話齋,Why Not Both? 三十前,基本上我係月光族,無乜負債,太硬係儲唔到錢,見到好多廿幾歲Blog友年紀輕輕已經有幾廿萬甚至幾球資產真係十分葡萄,亦非常佩服。到近幾年,資產增加速度快咗,除咗因為結婚修心養性駛費少咗之外,重點係收入增加。

職場新鮮人,一萬人工加到萬二蚊,分別唔會好明顯,反而搵得多,駛錢鬆手咗,反而儲錢仲少咗。加到咁上下,只要開支控制到,隨住人工增加得越來越快(複式效應!),儲錢速度自然幾何級數上。增加資產不外乎兩大老土心法,開源節流,量入為出。

講返生活。雖然自己無乜錢剩,但總算有過快樂的童年及青年。

小學時代放學踢波打機,功課自己搞掂。中學時代跨區返學,朋友圈遠了,但慶幸尚有不少知心好友。會考Hea住讀,僅僅夠分原校升讀。最勤力要數A-Level兩年,但比起10A尖子的付出又算什麼?我連習都未補過,當然成績亦只是中規中舉,勤力啲可能大學選科的選擇更多?不過,讀到神科又係咪自己興趣嗰科?奇怪香港地就係定型搵工要做返本科,失敗的教育制度偏偏無乜有用既專科。

大學生活更是頹到爆,三年轉眼好快過。兼職除咗補習仲做過傳單同外賣仔,搵錢唔多,只夠搞掂自己生活費,仲傻傻俾相當多家用。屋企人幫手比學費,畢業雖然無儲蓄,但起碼無負債還錢壓力。大學讀書時算係同系眼中的筍科?仲記得好多人想博Year 2轉過嚟讀,結果搵工就羨慕隔離社工嗰科。畢業後Post-grad小圈子遊戲,除非成績標青有network,否則都係唔好晒時間。唔少同學翻兜社工牌,讀完搵食係唔錯,但對住d 「Kai人」實在係唔啱我。其實自己唔太適合,但可能有d演技既關係,負負碌碌入到「心水」嗰行。公司雖然係尻流流,但感恩跟著好師傅,終身受用。

廿幾歲無憂無慮,扣除家用自己搵自己駛,生活不算大癲大肺,但總算逍遙快活,只係d錢硬係唔知駛咗去邊。回頭諗返除咗家用之外,最大駛費係貴價玩具,例如:相機、結他。最霉嗰期捱咗兩年劏房,環境差,運氣特別衰。三字頭要擔起頭家,積極開源節流,不算富裕。談不上中產,但總算三餐溫飽,唔駛憂柴憂米。

工作,以前無考慮過同人生有何關係。可能工作壓力不算大,返工還返工,放工就放工。工作亦一向穩定,沒有考慮太多Work Life Balance的問題。但早前機緣巧合考慮轉工,原本以為已狠狠下定的決心,最後居然猶豫不決。後生時轉工可以好瀟灑,鍾意轉就轉,無乜需要考慮。人大了,特別係有家室後,顧慮確實會多了。所以,要拼事業應該趁後生。三十過後,經驗老練了,精力及膽量卻不如往時。

早前轉工請教前輩們意見時,有幾句說話對我人生觀有相當大影響,值得分享吓:

「轉工有好多考慮,唔係淨係睇份工,你要諗吓你人生既plan啊!頭幾年小朋友很需要爸媽陪伴啊。」

「人生有好多選擇,有時係好難揀。入間大公司打份工,一步步升上去做管理層當然喺好多人眼中係好『成功』,但你諗吓係咪要用大眾把尺去量度咩叫成功/開心?抑或係用返自己把尺去度呢?」

「今日睇呢個Offer覺得好吸引,可一不可再,但其實選擇很多,機會處處,或者有更好的在前面。何況,全職工作並不是Career的全部。」

經過今次「想轉工」既經歷,感覺好似突然上了一課,大了幾歲。發現人生有太多值得珍惜,值得努力追求的東西。工作 / 金錢是重要,卻不是全部。職位虛銜等其實也只是過眼雲煙。如果我要為我既人生打打分,參考Maslow 金字塔Model的話會是咁的…以下既needs當然部份可以用「錢」滿足,但明顯地不會有一個Asset Needs,因為只儲金/資產是沒有意義的。

Self-Actualization ★★★★ 
工作自由度高,亦可以作很多新嘗試,希望未來能夠做到「行業因『我』而有點不同」就於願足矣。

Self Esteem ★★★★
不過不失,雖然工作無爆發性成長,但得到上司器重亦有一定發揮機會

Social Needs ★★★★★ 
唯一係同自己父母比較疏離,有啲遺憾,以我對朋友既「付出」黎計,身邊朋友對我真係好好

Safety Needs ★★★★★ 
好安全…無家暴等問題,香港更是十分安全的城市,無乜天災人禍呢。工作暫時亦未有被裁員的危機,過多三五七年就話唔埋

Physiological Needs ★★★★★ 
除咗屋細無乜好挑剔了,住屋問題喺香港好普遍…

嫌Maslow太academic?如果用比較Layman的Model應該不外乎呢幾樣,不同年紀,人生放的重點、比重當然會有所不同。後生時朋友、事業、金錢較重要,成熟時健康、家庭更珍貴。

金錢 ★★ 
窮L一名,餓唔死,唔使瞓街。比上不足,比下有餘

家庭 ★★★★ 
尚算可以,係同自己父母比較疏離,有啲遺憾,希望未來有改善

事業 ★★★ 
普普通通,正職沒大驚喜,但有新方向摸索緊但未成功

朋友 ★★★★★ 
由於放喺家庭時間多咗,同朋友相處時間自然少咗好多,但仍然有一堆好窩心既知心好友,加上寫Blog又識咗一班朋友係意外收穫

健康 ★★★★ 
除咗視力差少少同體能隨年紀下降外,慶幸無乜病痛,行得走得


比起拎十層收租樓出黎曬,我更羨慕Kelvin仔影相有才華。D相靚到嘩嘩聲,十八歲就代表香港,衝出國際,有型又有女!咩Needs都Fulfill晒啦,簡直係人生勝利組。十年廿年後即使Kelvin唔再做攝影,但回顧返自己呢段歷史時,都絕對值得自豪。

人生經歷建構你的人生,收租/影相二揀一,我都揀影相。老實講,講收租經驗,除咗其他收租仔或志願成為收租仔的人,咩人有興趣聽?同朋友開口埋口講收租,分分鐘仲惹人討厭。

曾經…我也試過揹住部勁重單反日日返工,放假又揹住上山下海,就係為咗捕捉一張半張靚相。分享下小弟拙作…算不上很WOW的作品,但按下快門的一刻卻記憶猶新。





人生......

「可悲的是它不能夠重來,可喜的是它不需要再重來」

19 則留言:

  1. 文章很有意義,相片亦都很有質素

    醉心兄找到自己的定位,清楚自己的需要,其實已經比很多人好

    有機會我都學下你咁樣分析下自己既情況先

    回覆刪除
    回覆
    1. 多謝Mike兄欣賞,以前影相真係好有心機,仲會影RAW檔執相,而家好少拎起相機了..

      「夾硬」要成為「成功人士」反而係悲劇,我都戳而家啲學生慘,細細個就好多「成功」既框框要去跟住被倒模

      刪除
  2. 鍾意個結尾,很有禪意。生命在於當下的瞬間。

    回覆刪除
    回覆
    1. 謝池兄,個結尾我要比返Credit一套電影 - 「童夢奇緣」

      刪除
  3. 多謝醉心兄分享,我看到了知足常樂 :)

    回覆刪除
  4. 閱歷使人豐富,回憶使人失落,遺憾卻是動力。

    回覆刪除
    回覆
    1. 很有禪意..尤其最後一句,謝謝

      刪除
  5. 難得小弟個名可以同一堆心理學權威係埋同一篇, 超級貼金.

    快樂童年, 你頭十幾年已經勝出左一局.
    唔駛父母擔心升學, 又幫你父母係40-60呢段勝出!(助攻黎架!)

    回覆刪除
    回覆
    1. 貼金就太謙虛啦! 有麝自然香,本篇諗法唔多唔少都係受70後兄影響,呢個Credit你應得既! 繼續寫好文鼓勵年青人搵自己既人生。

      多謝你鼓勵.. =)

      刪除
  6. 本熊幫醉心兄加多一項評分
    興趣⭐️⭐️⭐️⭐️
    按下快門的一刻卻記憶猶新,回想當初,都不枉過

    回覆刪除
    回覆
    1. 謝謝,興趣的確重要,亦是快樂的泉源

      刪除
  7. 唉也~~突然有人講哂我地呢一代心中既說話.......好有一種好親切既感覺,唔係誇大,睇到有D眼濕濕。

    回覆刪除
    回覆
    1. 文章可以感動到你是我的榮幸

      刪除
  8. 80 後真係己經老了, 再不是以前廿幾歲的花靚, 人生的成就亦不只是金錢, 如果只用金錢的多少來量度人生的成就未免太可悲

    回覆刪除
    回覆
    1. 事實上,有些80後只懂曬或葡萄人地既錢同樓,確實係可悲。宣揚這種風氣既人更是十分可恥。

      刪除
  9. 謝醉心兄分享心聲,獲益良多!可能做左人爸爸之後,心態就會改變,對人生既追求亦唔同。

    回覆刪除
    回覆
    1. 生兒育女確是一大轉變及挑戰 =) 我都要努力向各位爸爸學習

      刪除
  10. 醉心兄你好,作為同門(心理學)見到你個PSY LOGO就入左黎睇,對你呢句絕對認同

    '結果搵工就羨慕隔離社工嗰科。畢業後Post-grad小圈子遊戲,除非成績標青有network,否則都係唔好晒時間。唔少同學翻兜社工牌,讀完搵食係唔錯,但對住d 「Kai人」實在係唔啱我。'

    唔想讀Post-grad走學術路,又唔想做社工狂追數,CP/EP又唔到你玩既時候,真係唔知想做啲咩,就係迷惘時誤打誤撞撞左入價值投資,感覺有了方向亦多謝你既分享 :)


    回覆刪除