忍手

無現金喺手時乜都唔使諗，齋睇！有現金喺手就面對好多選擇，睇睇下就好易心急，怕蝕底賺少咗，結果狗衝買咗嘢。結果係點？咪一手蟹貨進退兩難咯。散戶如我經常面對這種困境。借此為鑑，近排又手痕，寫篇文提自己記得要「百忍成金」。

回顧今年，年頭是大好的入貨時機，但往往只能後知後覺。年頭恒指大約18,000點時，合上眼隨便買，現時都賺兩三成。可惜，上年在初期下跌時太急進買入，鎖死了現金，18,000點得個睇字。

如果有時光機就發達喇......哈哈。不過，歷史總是不斷重複的。我會否重複犯錯？

現時恒指在22,000-23,000點徘徊，唔上唔落。今年中間有買有賣，倉值大致持平，沒有過量買入。5月還清P-Loan後，加上收入增加，到年尾手頭現金頗充裕。所謂錢多就身痕，又心思思想入貨。現時港股唔上唔落，市況平穩，而家買分分鐘又有排蟹。

今次要記住上年的教訓，一字記之曰：「忍」！


忍手好過買完貨至斬